مارچ 29, 2024

ڈیلی سویل۔۔ زمیں زاد کی خبر

Daily Swail-Native News Narrative

سرائیکی وسیب تے سیلاب: دروہ دی ہک دریگھی کہاݨی|| مشتاق گاڈی

ڳالھ اوھا ہے جے اپݨا راج نہ ہوسن، فیصلے تخت لہور تھیسن تاں کوئی پچھݨ آلا نہ ہوسی۔اساں پنجاب کیتے ہک کالونی ہَئیں تے رہسوں۔ ݙوجھی پاسیوں ایں مستقل لاچاری تے غلامی دا اے نتیجہ نکلدا پئے جو اینجھے دروہیں دے خلاف سوال چاوݨ دا کوئی اَہر نئیں تھیندا پیا۔

مشتاق گاڈی

۔۔۔۔۔۔۔۔۔۔۔۔۔۔۔۔۔۔۔۔۔۔۔۔

سیلاب 2022 سانگے ایشئین ڈویلپمنٹ، ورلڈ بینک، یو۔این۔ڈٰی۔پی تے ٻنہیں اداریں دی ہک رپورٹ موجب سرائیکی وسیب دے ݙو ضلعیں (ڈیرہ غازی خان تے راجن پور) دا کُل ملا کنیں 160 ارب روپے دا نقصان تے خسارہ تھئے۔ ایں خسارے کوں جے اساں امریکی ڈالر وچ ݙیکھوں تاں اے 75 کروڑ ڈالر بݨدن۔
سیلاب دے ایتلے وݙے نقصان دے تدارک کیتے پنجاب حکومت اَڄاں تائیں کیا کیتے؟ تدارک کوں تاں چھوڑو، جے تساں پنجاب حکومت دی ویب سائٹ ݙیکھو تاں ڄاݨ تھیندی اے جو اتھاں سیلاب دا کوئی ذکر اذکار ای نئیں لبھدا۔ پنجاب حکومت دی پی ڈی ایم دی ویب سائٹ ݙٹھی ہے تاں کھل رووݨ کٹھے آندے۔ نہ کوئی سیلاب سانگے رپورٹ ملدی اے، نہ کوئی ڈیٹا اے، نہ کوئی ننویں اساری (rehabilitation) دا پلان اے۔ مثال کیتے جے ایں ویب سائٹ تے "رکوری ریسپانس” دا لنک کھلیندے ہائیں تاں اڳوں لکھا کھڑے جو ” رکوری ریسپانس دا بݨاوݨ وݙا ضروری ہوندے”۔ 😭😭 اینویں ای جے ڈیرہ غازی خان دا "risks analysis” دا لنک کھولو تاں ڄاݨ تھیندی ہے جو 10 فیصدی لوکیں کوں رودکوہیں دے فلڈ کنیں خطرہ اے جݙاں جو 80 فیصد لوکیں کوں زلزلے کنیں خطرہ اے۔ 😎😎
ایندے مقابلے سندھ حکومت سیلاب سانگے اپݨا پورا ہک بہترین "ڈیش بورڈ” بݨایا ہوئے جیندے وچ تمام لائیو ڈیٹا ݙتا کھڑے تے ہر سیکٹر وچ نقصان تے وت گورنمنٹ ریسپانس دی تفصیل ݙتی کھڑی ہے۔
ڳالھ اوھا ہے جے اپݨا راج نہ ہوسن، فیصلے تخت لہور تھیسن تاں کوئی پچھݨ آلا نہ ہوسی۔اساں پنجاب کیتے ہک کالونی ہَئیں تے رہسوں۔ ݙوجھی پاسیوں ایں مستقل لاچاری تے غلامی دا اے نتیجہ نکلدا پئے جو اینجھے دروہیں دے خلاف سوال چاوݨ دا کوئی اَہر نئیں تھیندا پیا۔ سوشل میڈیا تے چار ݙیہاڑیں دا رووݨ دھووݨ، کمیونٹی ریلیف دے چرچے تے اڳوں بھابھݨ بھوں اندھاراں راتیں۔ نہ کوئی مانیٹرنگ، نہ کوئی سوال چاوݨ۔

%d bloggers like this: