جون 26, 2022

ڈیلی سویل۔۔ زمیں زاد کی خبر

Daily Swail-Native News Narrative

پھیپھڑیاں دا گیت۔۔۔||رفعت عباس

سرائیکی وسوں دے مہان شاعر رفعت عباس دے کلام وچوں چون ڈیلی سویل دے قارئین دی نذر

رفعت عباس
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
پھیپھڑیاں دا گیت
اے میڈے سینے دا باغ
جیڑھا تازہ ہوا نال کِھڑدے
جیندے اساطیری پھلیں دی خوشبو
میڈی دھمی دا پہلا کلام اے
اے بابل دے معلق باغات توں قدیم
میں تیݙیاں پوڑیاں چڑھ کر آیاں
میں تیکوں قصے وچوں مِلݨ پڄیاں
میکوں اپݨی کتاب دے پَنے پڑھݨ ݙے
توں ساڈا ٻوہا تاریخ دا بند نہ کر
اے میݙے دل تے جگر دے ہمسایے
اے میݙے قریبی سانگیاں دے ڄاݨو
اے میڈے محبوب دے نام دی پھلواڑی
اے میݙی ساریاں چڑیاں دے درخت
اے میݙے جیوݨ جوگ دا آسن
تو میݙا پہلا ناول ہیئیں
موت تئیں ݙکھ تئیں جنگ تئیں لڑدا ہویا
میڈے سنگتیاں دے باغات تئیں سانجھا
گھراں گلیاں بزاراں چوکاں دے نیڑے
تازی مانی تے تازہ پاݨی دا رکھوالا
ہک اوپری ریاست دے ویلے وچ
تیݙا کم وَدھ ویندے
قید تے کوڑیاں دی سزا وچ
تیݙا کم وَدھ ویندے
وبا دے ڈینہاں وچ
تیݙا کم وَدھ ویندے۔۔۔۔۔۔۔
اوہ اساݙی ڳالھ نی سݨدے
تیݙا کم وَدھ ویندے
اوہ ساکوں مندہ کڈھیندن
تیڈا کم ودھ ویندے
ڳِچی تیں ڳوݙے دے بار وچ
تیݙا کم وَدھ ویندے
اے میݙا دوست
اے میڈی تازہ ہوا دی کتاب

رفعت عباس دی کتاب "ایں نارنگی اندر” پڑھن کیتے کلک کرو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

%d bloggers like this: