مارچ 29, 2024

ڈیلی سویل۔۔ زمیں زاد کی خبر

Daily Swail-Native News Narrative

حکایت: رِگ ویدوں باہر||رفعت عباس

رَتڑی ہک شاعر نال پَرنیجی ' شاعر ہک پُراݨے شہر وچ مشہور پیا تھیندا ہا ' اوں رتڑی دیاں حکایتاں لکھیاں ' ہک جنگل دی حکایت وچ اوہ ݙوہیں دھمی تئیں جاگے دریا تاݨیں پڄے تے ٻیڑی وچ واپس آئے '

رفعت عباس
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
حکایت
رِگ ویدوں باہر
رِگ وید وچوں جواری, رَتڑی تے اِندر ہک گوٹھ وچ لتھے
جواری گوٹھ وچ کریانے دی ہک ہِٹی پاتی ‘ شہروں اوہ سامان چاوے ادھار وچ ویچے پر ہَٹی اوندی پَھل پئی ‘ آݙت اوہ چُھٹی کرے جوا کھیڈے ‘ اوہ ہَرے بھانویں جیتے بخت اونکوں لڳ ڳیا ‘ اوں ذال کوں وی رِگ ویدوں سݙوا اپݨے کول گِھدا تے چنگا ویلا گزریا
رَتڑی ہک شاعر نال پَرنیجی ‘ شاعر ہک پُراݨے شہر وچ مشہور پیا تھیندا ہا ‘ اوں رتڑی دیاں حکایتاں لکھیاں ‘ ہک جنگل دی حکایت وچ اوہ ݙوہیں دھمی تئیں جاگے دریا تاݨیں پڄے تے ٻیڑی وچ واپس آئے ‘ اوں رتڑی کیتے شیشہ کنگھی تے سُرخی گِھدی ‘ اوں رَتڑی کیتے مُندریاں کپڑے تے کئی رنگیاں گُرگابیاں گِھدیاں
رِگ ویدوں مُنشی رتڑی کوں چٹھی لکھی:
"بہوں مُد تھی گئی ہے تو رگ وید ول آ”
رتڑی ولدا لکھیا:
"میں شاعر نال خوش پئی وسدی ہاں رِگ وید وی خوش وسے”
اِندر وی چار ݙہاڑے گوٹھ اندر گُھمیا تے ولدا رِگ وید وَل ڳیا
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
رِگ وید: سندھ وادی وچ لکھیل پہلی کتاب
جواری: رِگ وید دا کردار
رَتڑی: رِگ وید وچ رات دی دیوی
اِندر: رِگ وید دا ہک وڈا دیوتا
(کُنجیاں دا گُچھا)

رفعت عباس دی کتاب "ایں نارنگی اندر” پڑھن کیتے کلک کرو

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ایں نارنگی اندر پڑھن کیتے کلک کرو

%d bloggers like this: