مارچ 28, 2024

ڈیلی سویل۔۔ زمیں زاد کی خبر

Daily Swail-Native News Narrative

حال وِہاݨی تے ݙُُو ڈھئی اَکھر||امجد نذیر

مَیں جہیں کئی لوک ہِن یا ہوسن جہڑے سرائیکی لوک سانجھ یا سرائیکی تحریک دے شئیت تریجھے فیز ئچ ایں دھارے نال آپݨی جڑت بݨائی اے یا بݨیدے پئین ـ تے ٻئی کئی نوجوان راہ پند ئچ ہِن

امجد نذیر

۔۔۔۔۔۔۔۔۔۔۔۔۔۔۔۔۔۔۔

اِتہاس کنوُں ثابت اے جو کَہیں تحریک دے اڳواݨ سوجھواݨ کُوں آپݨے کانٹریبیوشن دا احاطہ آپ نہی کرݨا چاہیدا، کیوں جو ایندے وچ آپ کُوں وݙا تے ݙوجھیاں کُوں چھوٹا کر ݙکھاوݨ دا نفسیاتی رُحجان غالب آ وَیندے ـ اِیہو جَہیں اِتہاس دی حیثیت تزکِ عالمگیری کنوں ذیادہ کائنی ھوندی یا وَت او محض دَرجناں سوانحی فِکشناں کنوں ودھ کوئی اہمیت نہیں رکھیندا "جَیندے وِچ مصنف پوہ ماہ دے سیّالے ئچ پنج کوہ تے پیدل سکول ویندئیں وئے درختاں تو درُمبھ تازہ اَمب چوپیندا ہئی ویندا” ـ میݙے خیال ئچ اے کَم آوݨ آلے پَرکھ پرچولئیں تے چھوڑ ݙیوݨا چاہیدا اے جو او اِیں تحریک دا غیرجانبدارانہ ، حوالی جاتی اتیں دستاویزی جائزہ گِھن لکِھن اتے تینقید و تجزیہ کرِن ـ
ݙُُوجھی ڳال اے ھے جو تاحال سرائیکی تحریک دے ماسِوائے سُنڄاݨ تے صوبائی مُطالبے دے بئے کوئی وݙے حاصلات کوئنی جو واہندے سَمے مَہا بھارت شروع کر ڈِتی ونڄے ۔ حقیقت اے ھے جو ماضی قریب یا بعید ئچ سینکڑاں لوکیں ایں عمل ئچ آپݨا ھَݙ بُت گِھسائے۔ کَھپائے، ساڑیے ـ پر تھیّا ایں ھے جو بَدلدے وئے ذرائع اَبلاغ ـ مراد، لکھئی، چھپئی، کمپوٹر لِٹریسی، سرائیکی لِکھت، پرنٹ میڈیا، الیکٹرانک میڈیا تے سوشل میڈیا دے اِنقلاب نال بعض لوک جِنہاں دا قابل قدر بلکہ خطیر کنٹریبیوشن ھائی ذرا یا ذیادہ پچھانویں ئچ لڳے ڳیئن تے بعض لوک جنہاں دا کنٹریبیشن تھولا یا سطحی یا معموُلی ھائی ذرا ء ذیادہ سامݨےآ ڳئین، وجہ صرف ٹیکنیکل وی تھی سڳدی اے ـ سِتم بالائے سِتم اِیند ے وِچ کلا س یا وسائل یا پہونچ اپروچ وی کُجھ کارنامہ سَر اَنجام ݙتے یا ݙتا ھوسی ـ نیّت ، مراد یا صلا حیت دے علاوہ ہرکہیں دی عمراء یا نوکری یا ذاتی مسلیّاں دا تقاضا الڳ ہے اور ھوسی ـ لٰہٰذا ہک ٻئے کنوں جواب طلبی یا گَز چاء ہک ٻئے دا قد ناپݨ مُناسب نئین جو اے سیاست کاراں دا کم نئین ھوندا ـ شاید کہیں حد تاک دانشوراں یا صحافیاں دا یا آوݨ آلے اتہاس کاراں یا نقاداں دا کم ھوندے ـ
مَیں جہیں کئی لوک ہِن یا ہوسن جہڑے سرائیکی لوک سانجھ یا سرائیکی تحریک دے شئیت تریجھے فیز ئچ ایں دھارے نال آپݨی جڑت بݨائی اے یا بݨیدے پئین ـ تے ٻئی کئی نوجوان راہ پند ئچ ہِن ـ اُونہاں واسطے کہڑا پیغام اتے کیّا مَعنویت سامݨے رکھی ونڄے ـ اے سوال وی اساݙے ریسلرز دے مدِ نظر ہووݨا چاہیدا اے ـ
فی الحال ایں سارے کم دا نتیجہ رہی سہی تحریک کُوں نقصان دی شکل ئچ نِکلدا پئے ـ یعنی نانویں تے جھیڑا، ڄغرافیے تے جھیڑا، پارٹٰئیں تے جھیڑا ، گروپاں دے اندروں جھیڑا، گروپاں دا ٻاہرو جھیڑا، جھیڑے دے اندروں جھیڑا، تے جھیڑے دے ٻاہر جھیڑا، جہڑا جھیڑا کرے اُوندے نال جھیڑا اتے جہڑا ناں کرے اوندے نال وّی جھیڑا، ہݨ یار لوک آپ ݙسن جو اڳو کیویں ٹروُں یا نہ ٹُروں ؟
مَیں پیپلز پارٹی دے ہک عہدے دار کُوں آکھیّم جو پیپلز پارٹی دی مرکزی قیادت کُوں سنیہہ ݙیوے جو او اڳلے الیکشن واسطے سرائیکی وسیب ئچ طوُفانی کم کرݨ تے سرائیکی صوبے دا مطالبے مُوجب اِتھاں انہاں دی وݙی جیت دا ٻہوں پوٹینشل اے ـ اُوں کُجھ ہفتیاں بعد میکوں جواب ݙِتا جو پیپلز پارٹی آہدی اے جو اساں کم تے کریندے پئے ہیں پر اُوتھاں اِتلا زیادہ گروہ بندی اتے دھڑے بازی اے جواُٹھ کہہں کروٓٹ ٻاہندا نظر نئیں آندا پیاء ـ سمجھ نہیں اوندی اڳون کیویں ٹرُوں !
بہر حال ڳال کرݨ دا مقصد اے ہے جو مجموعی طور تے اساݙی ” لارجر کاز” کُوں کافی نقصان تھیندا پئے تے ایندے اُتے سوچݨ اتے کوئی لائحہ عمل بݨاوݨ دی ضروُرت اے ـ مگر ایہا تے میڈے جہیں لوکا دا بھولپن اے: ن٘۔، ” مری سادگی دیکھ کیا چاہتا ھوں "
اے وی پڑھو:

تریجھا (سرائیکی افسانہ)۔۔۔امجد نذیر

چِتکَبرا ( نَنڈھی کتھا )۔۔۔امجد نذیر

گاندھی جی اتیں ٹیگور دا فکری موازنہ ۔۔۔امجد نذیر

گامݨ ماشکی (لُنڈی کتھا) ۔۔۔امجد نذیر

سرائیکی وسیع تر ایکے اتیں ڈائنامکس دی اڄوکی بحث ۔۔۔امجد نذیر

امجد نذیر کی دیگر تحریریں پڑھیے

%d bloggers like this: