عثمان کریم بھٹہ
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
لوک آہدن جو مہرے والا ہوں ویلے آپنڑیں پورے جوبن تے ہوندا ہا جڈاں عاشق خاں دے ڈوں بِھرا صادق خاں تے لیاقت خاں بزدار جیندے ہوندے ہَن. صادق خاں بزدار دا ناں بلاشبہ افسانوی شہرت دا حامل ہے. اج وی مہرے والا توں آونڑ والے کہیں بندے نال گال کریندے بیٹھے ہوو تے اگلے پندرہ منٹ اچ ڈوں واری او صادق خاں دا ناں نہ چاوے تاں اکھاہے او کُوڑا ہے او کڈاہیں مہرے والا گیا ہی کینی. باکمال سٹیج سیکرٹری، لاجواب حافظے دا مالک تے حیران کُن حسِ مزاح رکھنڑ والا صادق خاں 2005 اچ وسوں کوں مونجھا کر گیا تے اج تک مہرے والے دے میلے دی سٹیج ہوندے بغیر سُنجی ہے.
جعفر خاں بزدار ہوں وڈے جوان دا پُتر اے. اوہا ذہانت تے فطانت ہر عمل وچوں جھلکدی کھڑی ہے. پڑھ لکھ تے آیا تاں پنجاب پولیس جوائن چا کیتوس. ول شئید خیال اندا ہاسی جو پڑھن لکھنڑ دی کیا فائدا تھیا.. ؟ ہکے منٹ اچ ڈوں پُھلیں والی انسپکٹری کوں لت مار تے اکیڈمی کھول بیٹھے. ذہانت تے علم دا ایں توں ودھ کیا استعمال تھی سگدے جو آپنڑیں تے بنھیں دے بالیں دے مستقبل کوں سنوارنڑ تے لا ڈیوں.
کائنات دا سفر ہِیں کائنات دی پہلی کتاب ہے جیہڑی سائنس دے بارے وچ سرائیکی زبان اچ لکھی گئی اے. انتہائی سادہ، عام فہم تے روزمرہ ترکیبات کوں استعمال کرتے قاری کوں سمجھا سگنڑ دی یقیناً اے ہک عمدہ کوشش اے. مطالعہ جاری ہے ہر چیپٹر نویں راز کھولیندے. عظیم سٹیفن ہاکنگ آکھیا ہا جو میں "اے بریف ہسٹری آف ٹائم” ہُنیں لوکیں واسطے لکھی ہامی جیہڑے سائنس کوں بالکل کینی پڑھی ودے تاکہ "وہ بھی جان پائیں”. جعفر سئیں دی کتاب وی ایویں ای ہے. لازمی نہیں جو ہیکوں سائنس دا سٹوڈنٹ ہی پڑھے. اے کتاب ہر بندے کوں پڑھنی چاہیدی اے تانجو سائنس تے کائنات دے بارے وچ بنیادی معلومات تاں ہوون پیاں
سدا سلامت رہو جعفر سئیں تواڈا اے تحفہ ساڈی وسوں کیتے قیمتی اثاثہ ہے.
جُگ جُگ لکھو پئے
عثمان کریم بھٹہ دیاں بیاں لکھتاں پڑھو
یہ بھی پڑھیے
”””عشق ٻاجھوں جیوݨ کوڑ کہاݨی “ (وسیب یاترا :17)||سعید خاور
”خیرپور تے ہیرا منڈی لہور دا سانگا“(وسیب یاترا :16)||سعید خاور
[سرائیکی تحریک سانگے سئیں عامر حسینی دی ہک پوسٹ دا ولدا|| مشتاق گاڈی