نیلی ٹائل (نفرت تے محبت دا زرہ) ۔۔۔ ارشد لاشاری

ھک دور ھا ڄݙاں حضرت انسان رات کوں چندر تارے ݙیکھ تے حیران تھیندا ہا تے مختلف نظریے عقیدے تے اندازے لیندا ھا، ولا انسان نے ترقی کر تے زمین تو ٻاہر خلاء وچ خود ترپ ماریا تاں اوندے اتے آسمان، چندر، اتے تاریاں دے کئی حیرت انگیز راز فاش تھئے،،،

پر آسمان دی وسعت دے وچ جو سبھ تو ودھ حیران کن ھا، او ھا اساݙی اپݨی دھرتی (زمین، ارتھ)،

انسانی عقل تو لامحدود خلاء وچ ہݨ تک جتھاں سیارا زمین تو وی لکھاں گناہ وݙے دلچسب سیارے تے ستارے دریافت تھئے ھن، پر انھاں سب تو ودھ دلچسب اساݙا سیارا زمین ھے،،

پوسٹ دے نال لاتی ڳئی اصل فوٹو، دسمبر 1972 وچ چندر دو پندھ کریندے اپالو17مشن، ایرکرافٹ دے کیمرے نال سیارا زمین تو 29000 کلومیٹر پرے تو گھدی گئ ھے، ایں سوہݨی نیاب تے حیرت انگیز فوٹو کوں سائنسدانیں نیلی ٹائل (بلوماربل) دا ناں ݙتا،،.

ایں تصویر وچ دھرتی دے نظر آوݨ والے مناظر کجھ ایں طرح ھن جو سب تو اتے خطہ عرب دے ملخ نظر امدے پن، ایران تے عرب کو انڄ کرݨ آلی نیلی لکیر دراصل خلیج فارس ھے، ایندے علاوہ جزیرہ نما عرب تے افریقہ کو انج کرݨ والی ھک ݙوجھی نیلی لکیر نظردی پئی ھے اینکوں عرف عام رتاسمندر (ریڈسی) آکھیا ویندے، نسواری رنگ دا ٻہوں وݙا خطہ جو نظردا پئے او ٻارھاں ملخیں وچ کھنڈیا دنیا دے سب تو وݙے صحرا، صحراے صحارا ھے، ایں تو تلے نظر آوݨ آلا ساوا رنگ دنیا دا ݙوجھا وݙا افریقی ݙاھر (جنگل) ھے، ایندے نال ھک جزیرہ نظردا پے جو دنیا دے ھک وݙے سمندر ہند (بحرہند)وچ واقع مڈغاسکر ملخ ھے،،

ولا زمین تلویں پاسے کو نظر امدے دنیا دے سبھ تو وݙے برفانی ویرانے یعنی پنجویں وݙے براعظم انٹارکٹیکا ھے،،

انھاں تمام خطیاں دے اتے نظرݨ آلے کپاہ دے پھمبیاں وانگوں جُھڑ (بادل) ھن، جو ہر ویلھے سیارا زمین دے چئودھارو چکر لیندے راہندن،،

تہاکوں پتہ ھے!! اے فوٹوکیوں اہم فوٹو ھے،،

ایں سانگے اہم ھے کہ ایہا خوبصورت تے خلاء دی وسعت وچ ھک زرے تو وی سیکڑاں وسمے(گنا) چھوٹی جہی دھرتی اساݙی دھرتی ھے جیندے کجھ نکے جہے حصے دی حکومت سانگے لکھاں کروڑاں انسان قتل کر ݙتے ویندن، ایں نکے جہے زرے تے میں راہندا تساں راہندو، انسان دے رشتے، گھر، ایجادات،نفرت محبت تے ہر شے خلاء وچ ان ݙٹھے پندھ تے 17کلومیٹر فی سیکنڈ بھجدے سیارا زمین کو کائنات دے وچ منفرد تے حیرت انگیز بݨا ݙیندے،

امید ھے اڄ دا مضمون پسند آسی. تے دوست اینکوں تنقیدی نظر نال پڑھن تاکہ مزید بہتری دی کوشت کیتی ونڄے اتے جیکر کئی سنگتی سائنس دے کہیں وے شعبے نال تعلق رکھیندے میݙے نال رل تے سرائیکی زبان دی لکھت وچ ہک سائنسی پیج گروپ یا فورم بݨاوݨ وچ میݙی مدد کرے،،