میکوں سارا پتے جو تریخ اچ کیا تھیندا ریہا حے تے طاقت دے حصول واسطے اخلاقیات ہیک فضول استعارے دے سوا کوئی حیثیت دی حامل نئیں رہ ڳئی۔ پر حُسین دی راہ تے یزید دی رسم ڈوہیں اپݨے آپ اچ ہیک خاص رنگ اچ رنگیا ہویا ہن جتھاں نیکی تے بدی اپݨی تمام تر خصوصیات تے تشریحات نال اپݨے آپ کوں وا کر ڈیندن۔۔اینجھا نظارہ یا اینجھا استعارہ ساکوں معلوم تریخ اچ نئیں ملدا۔
حُسین دی لیگیسی کوں اگر اساں ذہن اچ پا گھنوں تے یقینا ساڈے دل اچ پیار ، محبت تے عزت و احترام دا بے عمیق جذبہ ساڈی نس نس اچ لہہ ویندے۔۔او حُسین جیرھا حضور پاک دی سب توں پیاری دھی فاطمہ دا لاڈلہ حے، او فاطمہ جیندی خاطر حضور سئیں اپݨی چادر مبارک وچھا کے اپݨے پیار دا اظہار کریندن۔۔حضرت فاطمہ کوں مولا علی نال پرنا کے حضور پاک اپݨے جگر دے ٹوٹے کوں مزید رتبہ عزت تے پیار دا ڈتا۔۔ول حسن ، حُسین جیویں اپݨے نانا دے نال کھیڈدے ریہے جیرھے رنگ ڈھنگ نال او اپݨے نانا سئیں دے مونڈھیں تیں چڑھ چڑھ کے دُنیا کوں ڈیہدے ریہے او وت اپݨے آپ اچ بے مثال محبت دے لا زوال واقعات ہن۔۔۔کملی والے ڈوہیں جہانیں دے سردار جیویں حسݨ حُسیݨ کوں کھڈالے تے پالے او بطور نانا دے کردار دے ہر ٻال کوں نصیب نئیں تھیندا۔۔
حضور ایں جہان توں بُھرکا وٹائے تاں اقتدار دی جنگ اچ کئی اینجھے واقعات تھائین جنھاں کوں سُݨ کے ہاں ٻارے تھیندے تے اکھیں رتیاں لال تھی ویندن۔۔
حُسین دی اماں سیݨ دی موت کربلا دی منزل دی پہلی سیلھ حے۔۔ول جو کُجھ تھیندا رہ او واقعات کہیں آؤ گُجھے تاں کائینی۔۔اقتدار دی رسی اچ جیرھے گھوگھے اہل بیت کھادن دُنیا اچ ایندی وی کوئی تریخ نئی ملدی۔۔۔خاندان،قبیلہ، برادری تے ریاست دی پاور پالیٹکس دے کہیں وی مروجہ معیار کوں انصاف دی کسوٹی تیں پرکھیا ونڃے تاں ہر حوالے نال اہل بیت ایں معیار تیں پورا اُتردے ہن پر جیرھا کجھ تھیا اوندا حتمی نتیجہ کربل دی شکل اچ ہی نکلݨا ہا۔۔
کربلا کوئی ہیک واقعہ نئیں بلکہ اے نتیجہ حے بہوں ساریاں واقعات دا جیندا ادراک تریخ کوں ڃاݨݨ آلیں کوں چنڳی تراویں حے پیا پر اتھاں کوئی ساہ نئیں کڈھ سڳدا کیوں جو اڃ وی کربلا بپا حے۔۔تے اتھاں حسین روز روز پیدا نئیں تھیندے بلکہ او تاں یکتا ہا جیرھا اڃ وی ہیݨے تے ڈکھیاریں دی تڈ حے۔۔ایں تڈ تیں تاں اڃ وی حسین کوں یاد کر کے اساں اپݨے ڈکھیں دا ماتم کر کے دل کوں ہاؤلا کر گھندے ہیں۔۔ساڈے سارے ڈکھ ہیک وڈے ڈکھ اچ مدغم تھی کے ساکوں وت ہیک نویں زندگی ڈیندن۔۔!
یہ بھی پڑھیے
جنرل قیوم کا المیہ۔۔۔||رؤف کلاسرا
ایران-اسرائیل کشیدگی اور مہنگائی کی لہر۔۔۔ || نصرت جاوید
گاؤں کا قبرستان۔۔۔||رؤف کلاسرا