بابا رام دیو دی کتھا کہانی: نیو گروازم، میڈیا اتیں کمرشل ازم دا نویکلا ملاپ۔۔۔مشتاق گاڈی

بابا رام دیو انڈیا دا ہک اجوکا مہا گرو سمجھیا ویندے۔ اوندے کروڑاں شیدائی ہن۔ او ہریانہ ریاست دے ہک غریب جھگے پیدا تھیا پر اج اوندے ہتھیکے کئی ٹیلی ویژن چینلز تے ارباں روپے منافع کماونڑ آلی ہک ملٹی نیشنل کمپنی ہے جیندا ناں پتن جلی ایورویدا ہے (پتن جلی ہزاراں وریہیں پرانڑا ہک منی رشی ہئی جئیں یوگا سُترا دی کتاب لکھی جڈاں جو ایورویدا دیسی ہندوستانی حکمت دا علم ہے)۔ ہک پاسیوں او اپنڑے ٹیلی ویژن چینلز تے یوگا تے ہیلتھ دے پروگرامز کریندے تے بئی پاسیوں پتن جلی ایورویدا دیاں درجناں پروڈکٹس دی اشتہاری بازی کریندے۔ ایں اشتہار بازی وچ او بھاشن ڈیندے جوساکوں ایورویدا دی مقدس حکمت نال بنڑی دیسی مصنوعات دا ورتارا کرنڑا چاہیدے تے نال نال او ہندو نیشنلزم دا چولا پا کنیں بدیشی مصنوعات دے بائیکاٹ دا آہدے۔

انہیں مصنوعات کوں مقبول بنڑاونڑ کیتے کہیں وچ گاں دا مُتر ملیا ہوئے تے کہیں وچ گاں دی پھوسی۔ اینویں ای فوڈ پروڈکٹس دی مشہوری کیتے قدرتی جڑی بوٹیں تے بنہیں دیسی ٹونڑے ٹوٹکیں دا حوالہ ڈتا ویندے

اوندی کمپنی پتن جلی ایورویدا دا 2011 وچ 317 کروڑ روپے دا منافع ہئی۔ 2016 وچ اے منافع 5000 کروڑ روپے تھی گیا۔ اگلے سال 2017 وچ اے منافع ودھ کنیں 10000 کروڑ روپے تھی گیا۔ پتن جلی ایورویدا بہوں سارے ویسٹرن کمپنیں، جیویں جو کال گیٹ، لیور تے نیسلے وغیرہ، کوں مارکیٹ وچ مات ڈے ڈتی ہے

سبھ کنیں دلچسپ گالھ اے ہے جو ہک پاسیوں ارباں روپے اوندے ہتھیکے ہن۔ او انڈیا دے چند امیر ترین لوکیں وچوں ہے۔ بئی پاسیوں او ہر ڈینہہ ٹیلی ویژن اُتیں بہہ، سنیاسیں دا گیرویں رنگ دا چولا پا لوکیں کوں یوگا دے لیکچرز ڈیندے۔ انہیں کوں آتم مکت تھیونڑ دے بھاشن ڈیندے۔

بابا رام دیو دی این کتھا کہانی دے پچھوں ساکوں جانڑ تھیندی ہے جو کیویں اوندی کامیابی پچھوں نیو میڈیا، کمرشل ازم تے پرانڑے گرو کلچر ۔روحانیت دا ہک نویکلا ملاپ ہے۔ اے ملاپ چھڑا بابا رام دیو دی کتھا کہانی وچ نئیں ملدا۔ ایہے عوامل ساکوں گھٹ ودھ ہندو نیشنلزم دے ابھار تے ودھارے وچ وی ملدن۔ ایں نیو گرو ازم تے ایندے اجوکے مارکیٹ تے میڈیا نال سانگیں کوں سمجھنڑ کیتے ودھیک پرکھ پرچول دی لوڑھ ہے۔

(بابا رام دیو بارے میڈی پیلھی جانڑ کاری اپنڑے ڈیپارٹمنٹ "میڈیا سٹیڈیز” دا کورس پڑھیندے تھئی۔ اپنڑی دلچسپی راہیں میں وت ایندے بارے ڈھگ پیپرز تے کتاباں کٹھاں کیتاں۔ ہک کتاب دا نمونہ اتھاں وی اٹیچ کریندا پیاں

ویب ڈیسک

See author's posts