"نارسیسس” یونانی دیومالائی کہاݨیں دا ہک نویکلا کردار ہے۔ اڄوکی سائیکالوجی وچ ایں دیومالائی کردار کوں ہک انج "پرسنیلٹی ٹائپ” دی حیثیت ݙتی ویندی ہے اتیں اینکوں ٻہوں سارے جذباتی وڳاڑ دا کارݨ سمجھیا ویندے۔
یونانی دیومالائی کہاݨی موجب نارسیسس دریا دے دیوتا "سیفیسس” تے اوندی ہک اَپسرا ذال "لیروپ” دا سپتر ہئی۔ او اپݨے سوھݨپ۔ سروپ وچ یکتا سمجھیا ویندا ہئی تے ہر ویلھے اوندے گھمنڈ تے غرور وچ غرق رہندا ہئی۔ ہک واری او جنگل وچ شکار کیتے ڳیا تاں اُتھاں ہک پہاڑی اَپسرا "ایکو” اونکوں ݙٹھا تے اوندے اݨ کھٹ تے اݨ مٹ پریم وچ پَھس ڳئی ( اے ایہو "ایکو” ہے جینکوں اساں سرائیکی وچ پڑݙو آہدے ہئیں)۔ ایکو لُک چھُپ کنیں نارسیس دا پیچھا کرݨ لڳ پئی۔ نارسیس کوں جݙاں اے گُمان گُذرا جو کوئی اوندا پیچھا کریندا پئے تاں اوں زور نال ہکل ݙتی: ” کون ہائیں؟”۔ ایکو اوندے ولدے وچ ہکل ماری، ” کون ہائیں؟”
لُنڈی کہاݨی اے ہے جو "ایکو” اپݨے آپ کوں نشابر کیتا تے ” نارسیسس” کوں ڳلکڑی پاوݨ دا ترلا کیتا۔ نارسیس اوندے پریم کوں اپݨے سوھݨپ تے حُسن دے گھمنڈ وچ یکسر مسترد کر ݙتا تے ایکو اپݨے بھنے ترٹے دل نال کلہیپے دا دردناک جیوݨ جیوݨ پئے ڳئی۔ آہدن اوندا پورا جیوݨ ٻس ہک ایکو۔۔ پڑڈو بݨ ڳیا۔ اے سبھ کُجھ بدلے دی دیوی "نیمیسس” ݙیہدی کھڑی ہئی تے اوں نارسیسس کنیں ایں سنگدلی دے بدلے دی ٹھاݨ گیدھی۔ اوں نارسیس کوں مجبور کیتا جو او جنگل وچ پاݨی دے ہک ٹوبھے دو ونجے تے وت اتھاں جݙاں اوں پاݨی وچ اپݨی چھٹک ݙٹھی تاں او اپݨی ایں چھٹک ۔۔ عکس کوں اپݨے آپ کنیں انج سمجھیا تے اوندے نال اینجھے پریم ۔۔ عشق وچ غرق تھیا جو کئی ٻئی پاسیوں اوندی دید نہ ڳئی۔ اپݨی ایں چھٹک دی ٹرانس وچ اوں کئی وریہے۔۔ سال اپݨے آپ کوں بُکھیں تُسیں ݙیہدے گُذار ݙتے تے چھیکڑ وچ ایں جذب وچ ایتلا گُھل ڳیا جو ہک پُھل دے روپ وچ وٹیج ڳیا۔ ایں بُھل دا ناں وی "نارسیس” یا نرگس ہے۔ اوھا نرگس جیندے بارے علامہ اقبال لکھیا جو کئی ہزار وریہیں اپݨی بے نوری تے رروݨ پچھوں ٻہوں اوکھ نال اوندا کئی "دیدہ ور” ڄمدے۔
اڄوکی سائیکالوجی وچ "نارسیسزم” یا "نرگسیت” ساݙی پرسنیلٹی دا ہک اینجھا ڈس۔آرڈر یا وڳاڑ سمجھیا ویندے جیڑھا انتہائی خود پسندی تے خودغرضی کوں جنم ݙیندے۔ اے نرگسیت پسندی ساݙے ٻلپݨ وچ پیلھوں ہک ڈیفیس دی طرانح بݨدی ہے پر اڳوں ودھ کنیں وت ساݙا پورا مُکھ مہاندرا بݨ ویندی ہے۔
نارسسٹ یا نرگسیت پسند دیاں کُجھ علامتاں اے ہوندن:
۔ اپݨے آپ کوں ٻہوں اُتم تے مہاݨ سمجھݨ
۔ آپت دے سانگے وچ انتہائی خود غرض ہووݨ تے ٻنہیں کوں "سندر سلو” وانگ ورتݨ
۔ محبت تے پریم دا ٻہوں اظہار کرݨ پر اوندے پچھوݨ آپݨی مورت ڈیکھݨ۔
۔ پریم یا محبت وچ برابری تے سانجھی ہمدری دے احساس کنیں عاری ہووݨ
۔ ہر شے تے اپݨا حق سمجھݨ تے اوندی ملکیت دا دعوی رکھݨ
۔ فینٹسی یا جاڳدی اکھ نال اپݨی عظمت تے کامیابی دے خواب ݙیکھݨ
۔ ٻنہیں نال ساڑا رکھݨ تے اے سمجھݨ جو ٻیا ہر کوئی اوں کنیں سڑدے۔
۔ گھمنڈی ہووݨ تے ٻنہیں کوں عیاری تے چالاکی نال اپݨے لاغرضی دا یقین ݙواوݨ
اڄوکی سائیکالوجی وچ "آرٹ” تے ” نارسیسزم” وچ ہک ڳوڑھا ڳانڈھا ݙٹھا ویندے۔ تخلیق کیتے کہیں حد تائیں ” نارسیسزم” دی ہک لازمی لوڑھ پوندی ہے۔ پر تجربہ ݙسیندے جو ٻہوں واری ” آرٹسٹ” ہک حد کنیں ودھے "نارسیسزم” دا شکار تھی آپݨے کوں رب دا درجہ ݙے ٻہندے تے اپݨی ہر کرت کوں چمتکار سمجھیندے۔
(ایں پوسٹ کوں جے کوئی بادی النظر وچ اپݨے خلاف سمجھے تاں اے وی گھٹ ودھ "نارسسٹ” ہووݨ دی نشانی ہوسی۔ ڄاݨ سُنڄاݨ ہک دریگھا کم ہے تے اونکوں ٻہوں ذاتی رُخ ݙیوݨ چنڳا نئیں ہوندا)
یہ بھی پڑھیے
”ست سہیلیاں دِی کہاݨی، حقیقت یا فسانہ“ (وسیب یاترا :19)||سعید خاور
سکھر تے بکھر دِی کتھا“(وسیب یاترا :18)||سعید خاور
”””عشق ٻاجھوں جیوݨ کوڑ کہاݨی “ (وسیب یاترا :17)||سعید خاور