4مئی 2020: آج ضلع ڈیرہ اسماعیل خان میں کیا ہوا؟

دوران سروس وفات پا جانے والے اہلکاروں کے اہل خانہ کے ایک فرد کو نوکری فراہم

ڈیرہ اسماعیل خان : پولیس اہلکاروں کے لیے اچھی خبر، دوران سروس وفات پا جانے والے اہلکاروں کے اہل خانہ کے ایک فرد کو نوکری فراہم کی جائے گی۔

خیبر پختونخوا پولیس افسران واہلکار اگر دوران سروس کسی بھی وجہ سے انتقال کر جائیں تو ان کے اہل خانہ میں ایک فرد کو نوکری دینے کافیصلہ کیاگیا ہے ۔اس ضمن میں ڈیرہ پولیس میں تعینات سابق سی ڈی آئی اسلم خان کے بیٹے سمیت چھ پولیس اہلکاروں کے بچوں نے کاغذات جمع کرادیئے ہیں

جن کا میڈیکل ٹسٹ مکمل ہونے پر انہیں محکمہ پولیس میں بھرتی کیا جائے گا ۔ پولیس حکام کا کہنا ہے کہ پولیس اہلکار 24 گھنٹے ڈیوٹی سر انجام دیتے ہیں اور مختلف بیماریوں میں مبتلا ہوجاتے ہیں،

یا دوران ڈیوٹی کسی حادثے کی وجہ سے انکی وفات ہوجاتی ہے تو خیبر پختونخوا پولیس انکے اہل خانہ کی مدد کے لیے ساتھ کھڑی ہے.انہوں نے کہا کہ اس سے پہلے صرف پولیس شہدا ءکی فیملیز کو مکمل تنخواہ اور مراعات دی جاتی تھیں،

حکومت کی منظوری کے بعد دوران سروس وفات پانے والے اہلکار کے اہل خانہ کو بھی مراعات مل سکیں گی۔ اس اقدام سے ایک جانب تو پولیس اہلکاروں کو حوصلہ بلند ہوگا دوسری جانب ان کی فیملیز کو احساس تحفظ ملے گا۔

٭٭٭
سسرال جانے سے منع کرنے پر فائرنگ ،نوجوان زخمی

ڈیرہ اسماعیل خان ( غنچہ نیوز)تھانہ سٹی کی حدود محلہ عیسب زئی میں فائرنگ سے نوجوان کو شدید زخمی کردیا گیا ،پولیس نے ملزم کے خلاف مقدمہ درج کرکے اسے گرفتارکرلیا۔

پولیس ذرائع کے مطابق تھانہ سٹی ڈیرہ کی حدود محلہ عیسب زئی میں مسلح شخص نے فائرنگ کرکے محمد شہزاد ولد نور محمد قوم اعوان سکنہ خیبر ٹاﺅن حال گھگھلاں فقیر والا سٹی ڈیرہ کو شدید زخمی کردیا ،زخمی کو فوری طور پر ہسپتال منتقل کردیاگیا ،

پولیس نے زخمی کی رپورٹ پر ملزم جمشید ولد اقبال قوم روہیلہ سکنہ محلہ عیسب زئی کے خلاف اقدام قتل کا مقدمہ درج کرلیاہے۔وجہ عداوت سسرال جانے سے منع کرنے پر تنازع بیان کیاگیا۔

٭٭٭
آئس ،ہیروئن ، چرس اور اسلحہ برآمد ہونے پر17 ملزمان گرفتار

ڈیرہ اسماعیل خان ( غنچہ نیوز)ڈیرہ پولیس نے مختلف کاروائیوں کے دوران آئس ،ہیروئن ، چرس اور اسلحہ برآمد کرکے17 ملزمان کو گرفتارکرلیا،کینٹ پولیس نے علاقہ خیبر آباد میں ملزم مہربان الدین سکنہ محلہ جوگیانوالہ سے آئس برآمد کرکے اسے گرفتارکرلیا ،

سٹی پولیس نے ملزمان دویم سکنہ محلہ خدمتگانوالہ ،فضل الرحمٰن سکنہ پہاڑپور کے قبضہ سے ایک کلو گرام سے زائد چرس جبکہ ملزم محمد نوید سکنہ گرین ٹاﺅن کو گرفتار کرکے اس کے قبضہ سے ہیروئن اورکمشنری بازار میں ملزم محمد خالد سکنہ چودھوان کو گرفتارکرکے اس سے ایک پسٹل تیس بور اور اکیس کارتوس برآمد کرلیے ،

کینٹ پولیس نے مختلف کاروائیوں میں تین ملزمان احسن بلال سکنہ بستی ڈیوالہ ،قمر عباس سکنہ کچی پائند خان اور رحمت اللہ سکنہ انڈس کالونی کو گرفتار کرکے ان سے آئس اور غیرقانونی اسلحہ برآمد کرلیا،نواب پولیس نے پانچ افراد کو گرفتار کرکے چرس اور اسلحہ برآمد کرلیا ،

پروا اور یونیورسٹی پولیس نے غیر قانونی اسلحہ برآمد کرکے چار ملزم کو حراست میں لے لیا ہے۔ پولیس نے ملزمان کے خلاف الگ الگ مقدمات درج کرلیے ہیں ۔

٭٭٭
جوئے کی محفل پر چھاپہ مار کر آٹھ افراد کو موقع سے رنگے ہاتھوں گرفتارکرلیاگیا

ڈیرہ اسماعیل خان ( غنچہ نیوز)یارک پولیس نے تاش کے ذریعے جوئے کی محفل پر چھاپہ مار کر آٹھ افراد کو موقع سے رنگے ہاتھوں گرفتارکرلیا،پولیس نے ملزمان کے قبضہ سے بھاری نقدی اور چرس برآمد کرکے ان کے خلاف مقدمہ درج کرلیا۔

یارک پولیس نے علاقہ یارک میں تاش کے ذریعے جواءکھیلنے کی اطلاع پر چھاپہ مارا اور دوران چھاپہ زنی آٹھ افراد کو موقع سے رنگے ہاتھوں گرفتارکرلیاگیا ،

پولیس نے ملزمان کے قبضہ سے ساڑھے پندرہ ہزار روپے داﺅمنی جبکہ جامہ تلاشی کے دوران تین ہزار دو سوروپے ،دو سو دس گرام چرس اور تاش کے پتے برآمد کرلیے ہیں ۔

پولیس نے ملزمان کے خلاف قمار بازی ایکٹ اور امتناع منشیات ایکٹ مقدمہ درج کرکے انہیں حوالات میں بند کردیا ہے۔

٭٭٭
ملزمان نے 17 سالہ نوجوان کو چھریوں کے پے در پے وار سے شدید زخمی کردیا

ڈیرہ اسماعیل خان ( غنچہ نیوز)تھانہ چودھوا ن کی حدود کڑی شموزئی میں ملزمان نے 17 سالہ نوجوان کو چھریوں کے پے در پے وار سے شدید زخمی کردیا،نوجوان کو نہایت تشویشناک بہوشی کی حالت میں ہسپتال منتقل کردیاگیا ،

پولیس نے زخمی کے والد کی رپورٹ پر دو ملزمان کے خلاف اقدام قتل کا مقدمہ درج کرلیا ،پولیس ذرائع کے مطابق تھانہ چودھوان کی حدود کڑی شموزئی خڑ میں ملزمان نے چھریوں کے پے در پے وار کرکے سترہ سالہ نوجوان محمد شریف ولد شیر خان قوم استرانہ سکنہ کڑی شموزئی کو شدید زخمی کردیا ،

ملزمان موقع سے فرا رہوگئے ،زخمی کو بہوشی کی حالت میں ہسپتال منتقل کردیاگیا جہاں اس کی حالت انتہائی تشویشناک بتائی گئی ،پولیس نے زخمی کے والد کی رپورٹ پر دو ملزمان عبداللہ شاہ ولد مہر شاہ اور رحیم شاہ ولد کریم شاہ اقوام استرانہ ساکنان کڑی شموزئی کے خلاف اقدام قتل کا مقدمہ درج کرلیا ،زخمی کے والد کے مطابق اسے وجہ عداوت معلوم نہیں ہے۔

٭٭٭
ڈپٹی کمشنر ڈیرہ محمد عمیر کی زیر صدارت اجلاس کا انعقاد

ڈیرہ اسماعیل خان ( غنچہ نیوز)ڈپٹی کمشنر ڈیرہ محمد عمیر کی زیر صدارت اجلاس کا انعقاد۔ کورونا کی موجودہ صورتحال اور انتظامات بالخصوص کورونا وائرس کے پھیلاﺅ کے حوالے سے مشتبہ/متاثرہ علاقوں سے متعلق امور زیر بحث لائے گئے۔

اجلاس میں ڈسٹرکٹ ہیلتھ آفیسر ڈیرہ ڈاکٹر عارف محمود، ڈین گومل میڈیکل کالج ڈاکٹر ارشد علی، اسسٹنٹ کمشنر ڈیرہ محسن صلاح الدین، ریجنل ڈیزیز سرویلنس آفسیر ڈاکٹر ماجد سلیم ، این سٹاپ آفیسر ڈاکٹر حفیظ اﷲ ، ای پی آئی کوارڈینیٹر ڈاکٹر عرفان عزیز،

ڈاکٹر عنایت اﷲ سمیت محکمہ صحت، پولیس، پاپولیشن ویلفیئر، محکمہ مال و دیگر متعلقہ محکموں کے افسران و نمائندوں نے شرکت کی۔اجلاس کے دوران بتایا گیا کہ ضلع بھرمیں مختلف مقامات پر سیمپلنگ کا عمل جاری ہے جس سے متاثرہ علاقو ں کی نشاندہی میں بھی کافی مدد ملتی ہے۔

اس موقع پر ڈپٹی کمشنر نے کہا کہ کورونا وائرس کی صورتحال سے متعلق روزانہ کی بنیا د پر رپورٹ تشکیل دی جائے اور کورونا وائرس سے متاثرہ علاقوں میں سیمپلنگ کو ترجیحی بنیادوں پر مکمل کیا جائے تاکہ کورونا وائرس کے پھیلاﺅ کا بروقت تدارک یقینی بنایا جا سکے۔

اس موقع پر ڈپٹی کمشنر نے سخت احکامات جاری کرتے ہوئے کہا کہ سیمپلنگ سے انکار یا رکاوٹ کو کسی صورت برداشت نہیں کیا جائیگا کیونکہ یہ ایک قومی فریضہ ہے اور اس کی ادائیگی میں غفلت ہرگز برداشت نہیں کی جائیگی۔

انہوں نے کہا کہ لوگ کورونا وائرس کی صورتحال اور اس سے بچاﺅ کی احتیاطی تدابیر سے متعلق بخوبی آگاہ ہیں لہذا ان احتیاطی تدابیر بالخصوص سماجی فاصلہ برقرار رکھنے پر عملدرآمد کو یقینی بنائیں۔

انہوں نے مزید ہدایت کی کہ محکمہ صحت کے تکنیکی عملے کی کارکردگی کو مزید موثر بنانے کیلئے ٹریننگ کا عمل جاری رکھا جائے اور انہیں مکمل حفاظتی تدابیر اپنانے کا پابند بنایا جائے۔

انہوں نے محکمہ پولیس کو ہدایت کی کہ وہ کسی بھی صورتحال سے نمٹنے کیلئے ہمہ وقت تیار رہیںتاکہ محکمہ صحت کے اہلکاروں کو اپنے فرائض کی ادائیگی کے دوران کسی قسم کی دشواری کا سامنا نہ رہے۔

٭٭٭
پولیس اہلکار ظہور دماغ کی شریان پھٹنے سے وفات پاگیا

ڈیرہ اسماعیل خان ( غنچہ نیوز)تھانہ کلاچی میں تعینات پولیس اہلکار ظہور دماغ کی شریان پھٹنے سے وفات پاگیا ،مرحوم کی نماز جنازہ ادا کرکے اسے آبائی قبرستان میں سپرد خاک کردیاگیا۔

ذرائع کے مطابق تھانہ کلاچی میں تعینات پولیس اہلکار ظہور ولد عبداللہ قوم شیخ سکنہ کلاچی کوبرین ہیمرج ہونے کے باعث تشویشناک حالت میں ڈسٹرکٹ ہسپتال ڈیرہ منتقل کیاگیا جہاں طبی امداد کے باوجود رات گئے اس کی اچانک طبیعت بگڑ گئی

اور دماغ کی رگ پھٹ جانے کے باعث اس کا انتقال ہوگیا ،مرحوم کی میت کو ایمبولینس کے ذریعے گاﺅں روانہ کیا گیا جہاںنماز جنازہ کی ادائیگی کے بعد مرحوم کو آبائی قبرستان میں سپرد خاک کردیاگیا۔

٭٭٭
شوہر کی بیوی کو میکے پہنچا کر بچے زبردستی چھین کر ساتھ لے جانے کی کوشش،مزاحمت پر خاتون زخمی

ڈیرہ اسماعیل خان ( غنچہ نیوز)تھانہ یونیورسٹی کی حدود روڈا شریف میں شوہر کی بیوی کو میکے پہنچا کر بچے زبردستی چھین کر ساتھ لے جانے کی کوشش ، مذاحمت پر بیوی اور سالے کو تشدد کرکے زخمی کردیا گیا ، شوہر بچے چھین کر فرار ہوگیا ،پولیس نے واقعہ کی رپورٹ درج کرلی ،

پولیس ذرائع کے مطابق تھانہ یونیورسٹی کی حدود روڈا شریف میں گھریلو لڑائی جھگڑے کے باعث شوہر نے بیوی کو میکے میں چھوڑا اور بچے زبردستی اپنے ساتھ لے جانے کی کوشش کی ،مزاحمت پر شوہر نے اپنے بھائیوں کے ہمراہ بیوی اور سالے کو تشددکا نشانہ بنا کر شدید زخمی کردیا

اور بچے زبردستی چھین کر فرار ہوگیا ،زخمی کو طبی امداد کے لئے ہسپتال منتقل کردیاگیا ہے،پولیس نے واقعہ کی رپورٹ درج کرلی ۔

٭٭٭
گھریلو ناچاقی پر چچا بھتیجے کا ایک دوسرے پر چاقوﺅں سے حملہ

ڈیرہ اسماعیل خان ( غنچہ نیوز)گھریلو ناچاقی پر چچا بھتیجے کا ایک دوسرے پر چاقوﺅں سے حملہ ،باپ بیٹے سمیت تین افراد شدید زخمی ہوگئے ،زخمیوں کو ہسپتال منتقل کردیاگیا ۔

پولیس ذرائع کے مطابق تھانہ کینٹ کی حدود شاہ جہان شہید ٹاﺅن ڈیرہ میں گھریلوناچاقی پر چچا بھتیجے نے ایک دوسرے پر چاقوﺅں سے حملہ کردیا جس کے نتیجے میں ایک جانب چچا اور اس کا بیٹا شدید زخمی جبکہ دوسری جانب بھتیجا زخمی ہوگیا ،

تینوں زخمیوں کو طبی امداد کے لئے ہسپتال منتقل کردیاگیا ہے۔وجہ عداوت چچا بھتیجے کی گھریلو ناچاقی اور لڑائی جھگڑا بیان کیاگیاہے۔پولیس نے دونوں جانب کی الگ الگ رپورٹس درج کرلی ہیں ۔

٭٭٭
بی ای ایسوسی ایٹ ڈگری کے چار گروپس میں داخلے آفر کردئیے

ڈیرہ اسماعیل خان ( غنچہ نیوز) علامہ اقبال اوپن یونیورسٹی نے سعودی عرب ، متحدہ عرب امارات ، کویت ، بحرین اور عمان میں مقیم پاکستانیوں کے لئے بی ای ایسوسی ایٹ ڈگریHECکی نئی پالیسی کے مطابق چار گروپس میں داخلے آفر کردئیے ہیں ،

اِن میں( ایسوسی ایٹ ڈگری )جنرل گروپ(، ایسوسی ایٹ ڈگری )کامرس گروپ،ماس کمیونیکیشن گروپاور( لائبریری انفارمیشن سائنسسز گروپ)شامل ہیں۔ایف ای/ایف ایس سی یا مساوی اسناد رکھنے والے اِن پروگرامز میں داخلہ حاصل کرسکتے ہیں۔

مدت پروگرام دو سال)چار سمسٹر(ہے۔داخلہ فارم جمع کرانے کی آخری تاریخ 5۔جون مقرر کی گئی ہے۔ میٹرک اور ایف اے اسناد کی تصدیق شدہ فوٹو کاپیاں ، شناختی کارڈ ،پاسپورٹ ،ویزا ، اقامہ کی تصدیق شدہ فوٹو کاپی داخلہ فارم کے ساتھ منسلک کرنا ضروری ہے۔

داخلے کے خواہشمند افراد کو تاکید کی گئی ہے کہ وہ داخلہ فارم کے ساتھ اپنی تازہ ترین تصویر چسپاں کریں ، تصویر کے بغیر داخلہ فارم قابل قبول نہیں ہوگا۔داخلہ فیس اور فارم جمع کرانے کا طریقہ کار پراسپکٹس میں درج ہے۔

بیرون ملک مقیم پاکستانی ایسوسی ایٹ ڈگری کے داخلہ فارم اور پراسپکٹس ویب سائٹ https://aiou.edu.pk/overseasdel.asp سے ڈاﺅن لوڈ کرسکتے ہیں۔

اوپن یونیورسٹی ملک کی واحد جامعہ ہے جو کئی سال سے مشرق وسطیٰ کے ممالک میں مقیم پاکستانیوں کو تعلیمی سہولتیں فراہم کررہی ہے۔داخلوں کے بارے میں مزید معلومات کے لئے ڈائریکٹوریٹ آف ریجنل سروسسز )

اوورسیز سیکشن(، بلاک نمبر 2۔علامہ اقبال اوپن یونیورسٹی ، سیکٹر H-8،اسلام آباد سے براہ راست یا فون نمبرز +92519057165, +92519250175پر رابطہ کیا جاسکتا ہے۔

٭٭٭
بدھ 6 مئی تک موسلادھاربارشوں اور طوفان کی پیشگوئی

ڈیرہ اسماعیل خان ( غنچہ نیوز)محکمہ موسمیات نے ملک بھر میں 4 مئی سے بدھ 6 مئی تک موسلادھاربارشوں اور طوفان کی پیشگوئی کی ہے جس پر تمام اداروں کو ریڈ الرٹ کردیا گیا۔ ضلعی انتظامیہ کو تین روز الرٹ رہنے کا حکم دیا گیا ہے۔

نشیبی علاقوں اور بڑے ندی نالوں کے کنارے آباد شہریوں کو بھی محتاط اور ہوشیار رہنے کی ہدایت کی گئی ہے۔ گزشتہ روز بھی مختلف علاقوں طوفان کے ساتھ بارش اور ڑالہ باری ہوئی جس کی وجہ سے گرمی کا زور ٹوٹ گیا۔

٭٭٭
گندم ذخیرہ کرتے وقت اسے حشرات الارض اور ممکنہ بیماریوں کے خدشات سے بچانے کیلئے حفاظتی اقدامات اٹھائیں

ڈیرہ اسماعیل خان ( غنچہ نیوز)محکمہ زراعت نے گندم ذخیرہ کرتے وقت اسے حشرات الارض اور ممکنہ بیماریوں کے خدشات سے بچانے کیلئے حفاظتی اقدامات پر عملدرآمد کی ہدایت کی گئی ہے اورکہاگیاہے کہ گھریلو افراد گندم کو بھڑولوں اور بوریوں میں ذخیرہ کرتے وقت ان میں نیم کے پتے ضرور رکھیں تاکہ گندم کو حشرات الارض اورممکنہ بیماریوں کے خدشات سے بچاناممکن ہوسکے۔

ڈپٹی ڈائریکٹرمحکمہ زراعت (توسیع) نے بتایا کہ گندم کو محفوظ کرنا ایک بہت بڑا مسئلہ ہے جس کیلئے کاشتکاروں‘ کسانوں اور عام افرادکوخصوصی راہنمائی کی ضرورت ہوتی ہے۔

انہوں نے بتایا کہ عام طورپر کاشتکار اور بڑی تعدادمیں گھریلو افرادسال بھرکی گندم لے کر گھروں یا ڈیروں پربھڑولوں اوربوریوں میں ذخیرہ کرلیتے ہیں لیکن اکثر اوقات یہ گندم حفاظتی تدابیرپرعملدرآمد نہ ہونے سے خراب ہونا شروع ہوجاتی ہے۔

انہوں نے بتایا کہ دیہاتوں میں کسان کھانے اور بیج کیلئے اناج تقریباً ایک ہی جگہ ذخیرہ کرلیتے ہیں اور اس مقصد کیلئے وہ پٹ سن کی بوریوں میں اناج بھرکر گھرکے کمروں میں اینٹوں کے اوپر یالکڑی کے تختوں پر رکھ دیتے ہیں

اسی طرح بعض افرادصحن میں رکھے گارے یا لوہے کے بھڑولوں میں بھی اناج ذخیرہ کرتے ہیں۔

٭٭٭
دھان کے بیج کی تیاری میں خصوصی احتیاط برتیں

ڈیرہ اسماعیل خان ( غنچہ نیوز)ترجمان محکمہ زراعت نے کاشتکاروں کو دھان کے بیج کی تیاری میں خصوصی احتیاط برتنے کی ہدایت کی اور کہاہے کہ کاشتکار دھان کی فصل کو بکائنی اورپتوں کے بھورے دھبوں کی بیماریوں سے بچانے کے لئے 1کلوگرام بیج کو2سے اڑھائی گرام تک پھپھوندی کش زہرلگانے کے بعد پنیری کاشت کریں تاکہ دھان کی فصل کو نقصان پہنچنے کاخدشہ نہ رہے۔

کاشتکاروں کے نام پیغام میں انہوں نے کہا کہ جن علاقوں میں کدوکے ذریعے پنیری کاشت کی جاتی ہے وہاں بیج کو پھپھوندی کش دوائی والے محلول میں 24گھنٹے تک بھگوکررکھاجائے اور اس کے بیج کو نکال کر سایہ دار جگہ پررکھنے کے بعد انگوری مارے ہوئے بیج کا چھٹہ دیاجائے۔

انہوں نے کاشتکاروں کو ہدایت کی کہ وہ پھپھوندی کش زہرکا انتخاب مقامی زرعی ماہرین کے مشورہ سے کریں تاکہ بعدمیں انہیں کسی مالی نقصان کا سامنانہ کرناپڑے۔

٭٭٭
ٹماٹرکی فصل کو کیڑے مکوڑوں سے محفوظ رکھنے کیلئے فوری اقدامات کی ہدایت

ڈیرہ اسماعیل خان ( غنچہ نیوز)ترجمان محکمہ زراعت نے ٹماٹرکی فصل کو کیڑے مکوڑوں سے محفوظ رکھنے کیلئے فوری اقدامات کی ہدایت کی ہے اورکہاہے کہ کاشتکار بہتر پیداوارکے حصول کیلئے پودوں کے قریب زمین میں موجود سنڈیاں تلاش کرکے انہیں فوری تلف کرنے کیلئے اقدامات کریں‘

ضرررساں کیڑے ٹماٹرکی فصل پرپھل پکنے کے آخری مراحل میں حملہ آورہوکر پھل کو نقصان پہنچاسکتے ہیں۔انہوں نے بتایا کہ چورکیڑے کی سنڈی اگتے ہوئے پودوں کو رات کے وقت سطح زمین کے قریب سے کاٹ لیتی ہے اور دن کے وقت پودوں کے قریب چھپی رہتی ہے۔

انہوں نے کہا کہ کاشتکار سیون 350گرام فی ایکڑ کے حساب سے راکھ میں ملاکرٹمآٹر کے پودوں کے اردگرد بکھیردیں تاکہ امریکن سنڈی سے بچاﺅممکن ہوسکے۔

٭٭٭
پاکستان پوسٹ نے پنشن ادائیگی کے نظام کو مکمل طور پر کمپیوٹرائز کرنے کا منصوبہ شروع کردیا

ڈیرہ اسماعیل خان ( غنچہ نیوز) پاکستان پوسٹ نے پنشن ادائیگی کے نظام کو ملک کے تمام سرکاری اداروں کی ضروریات کے مطابق مکمل طور پر کمپیوٹرائز کرنے اور اس کا دائرہ کار دوسرے اداروں تک بڑھانے کیلئے جامع منصوبے کو حتمی شکل دے دی ہے –

اس سلسلے میں آئندہ مالی سال کے دوران پاکستان پوسٹ سے پنشن لینے والے پنشنرز کو اے ٹی ایم کے ذریعے پنشن ملے گی. پوسٹ آفس کے ترجمان نے صحافیوں کو بتایا ہے کہ سارا عمل تین ماہ میں مکمل کر لیا جائے گا-

انہوں نے بتایا کہ ڈائریکٹر جنرل پاکستان پوسٹ نے پنشن تقسیم کے موجودہ نظام میں پائی گئی خامیوں اور نقائص کی نشاندھی اور اسے فول پروف اور ہر ممکن شفاف بنانے کیلئے پنشن نظام سے منسلک تجربہ کار افسران اور عملے سے تجاویز لیں

اور انکی روشنی میں وزارت مواصلات کو نئے مجوزہ منصوبے سے آگاہ کرکے منظوری حاصل کی گئی- اس انقلابی منصوبے کے پہلے مرحلے میں ملک بھر کے تمام جی پی اوز میں اے ٹی ایم مشینیں لگیں گی اور بعد میں ان کے پوائنٹس کی تعداد میں بتدریج اضافہ کیا جائے گا-

اس سسٹم کے تحت پنشنرز کو یہ سہولت بھی ہو گی کہ وہ اپنی پنشن کسی بھی بنک کے اے ٹی ایم سے ہر وقت نکلوا سکیں گے۔اس سلسلے میں پاکستان پوسٹ کی طرف سے تمام ضوابط کی کارروائی مکمل کرنے اور منظوری کیلئے سٹیٹ بنک اور دیگر متعلقہ اداروں سے رابطے جاری ہیں –

بتایا جاتا ہے کہ اس منصوبے کی تکمیل میں وزارت مواصلات حکام بھی دلچسبی لے رہے ہیں۔ ذرائع کے مطابق پاکستان پوسٹ اس وقت 13 لاکھ ملٹری پنشنرز کے علاوہ پی ٹی سی ایل ، سی ڈی اے اور اپنے ادارے کے ریٹائرڈ ملازمین کو پنشن ادائیگی کی خدمات فراہم کر رہا ہے

تاہم اس اقدام کے نتیجے میں بڑی تعداد میں دیگر سرکاری محکموں کارپوریشنز اور خود مختار اداروں کے ملازمین کی پنشن کی ادائیگی پاکستان پوسٹ سے شروع ہو جائے گی۔

٭٭٭
چھوٹا اوربڑا گوشت انتہائی مہنگے داموں فروخت ہو رہاہے

ڈیرہ اسماعیل خان ( غنچہ نیوز)ڈیرہ شہر اور گردونواح میں چھوٹا اوربڑا گوشت انتہائی مہنگے داموں فروخت ہو رہاہے اور قصاب گوشت سرکاری ریٹس پر فروخت نہیں کر رہے۔

انہیں سرکاری ریٹ لسٹ کے مطابق گوشت فروخت کرنے کا کہیںتو وہ آگے سے بدتمیزی اور زدوکوب کرتے ہیں اس طرح عام وغریب آدمی چھوٹا بڑا گوشت کھانے سے بھی محرو م ہے۔

شہریوںکاکہناہے کہ سرکاری ریٹ بڑا گوشت 400روپے فی کلو اورچھوٹا گوشت فی کلو790روپے مقرر ہے لیکن قصاب اس ریٹ پر فروخت نہیں کر رہے اور وہ اس ریٹ سے زائد پر فروخت کر رہے ہیں جو غریب و عام افراد کی قوت خرید سے باہرہے۔

چھوٹا اوربڑا گوشت مہنگا ہونے سے شہری برائلر کو ترجیح دے رہے ہیں جس سے مارکیٹ میں خریدوفروخت میں بھی کمی ہے۔مذکورہ گوشت کی قیمتیں سلاٹرہاﺅس بیٹھے ڈاکٹرز نے مقرر کررکھی ہیں۔ گوشت مہنگا ہونے سے شہری گوشت جیسی مفیدغذا کھانے سے محروم ہیں۔

انہوںنے کمشنر ڈیرہ سے مطالبہ کیا کہ چھوٹے بڑے گوشت کی سرکاری قیمتوں پر فروخت کو یقینی بنایاجائے تاکہ غریب و عام افراد بھی گوشت کھاسکیں۔

٭٭٭
بینکوں اور مالیاتی اداروں نے ریلیف پیکج کے تحت 236 ارب روپے کے قرضے کی وصولی موخر کر دی

ڈیرہ اسماعیل خان ( غنچہ نیوز) کورونا وائرس کی وبا کے پیش نظر بینکوں اور مالیاتی اداروں نے ریلیف پیکج کے تحت 236 ارب روپے کے قرضے کی وصولی موخر کر دی ہے۔

اسٹیٹ بینک آف پاکستان نے پاکستان بینکس ایسوسی ایشن کے اشتراک سے قرض حاصل کرنے والوں کے لئے جامع ریلیف پیکج کا اعلان کیا ہے تاکہ کورونا کی وبا سے متاثرین کو مالی ریلیف فراہم کیا جا سکے۔

پیکج کے تحت بینکوں اور مالیاتی اداروں نے صارفین سے حاصل کئے گئے قرضوں کی اصل رقم کی وصولی موخر کرنے پر اتفاق کیا تھا اور اس ضمن میں اصل رقم کی وصولی ایک سال کے لئے موخر کر دی گئی ہے تاہم قرض حاصل کرنے والے صارفین متفقہ شرائط و ضوابط کے تحت سود ادا کرنے کے پابند ہیں۔

قرض کی اصل رقم کی وصولی کو موخر کرنے سے قرض حاصل کرنے والوں کی کریڈٹ ہسٹری متاثر نہیں ہوگی اور اس حوالے سے کریڈ بیورو کے اعدادو شمار میں ان کا اندراج نہیں کیا جائے گا۔پاکستان بینکس ایسوسی ایشن کے اندازوں کے مطابق آئندہ سال تک واجب الادا قرضوں کا حجم 4700 ارب روپے تک بڑھنے کا امکان ہے۔

ایسوسی ایشن نے قرض حاصل کرنے والے صارفین کو ہدایت کی ہے کہ اصل رقم کی ادائیگی میں تاخیر کی سہولت سے استفادہ کے لئے 30 جون 2020 تک متعلقہ بینکس اور مالیاتی اداروں کو تحریری درخواست دیں۔

ایسوسی ایشن کی رپورٹ کے مطابق 24 اپریل 2020 تک 3 لاکھ 3 ہزار قرض حاصل کرنے والے اصل رقم کی بعد ازاں ادائیگی کے اہل ہیں اور ان کی واجب الادا رقم 236 ارب روپے بنتی ہے۔ ریلیف پیکج سے استفادہ کرنے والوں میں زیادہ تر چھوٹے قرض حاصل کرنے والے شامل ہیں۔

About The Author

ویب ڈیسک

See author's posts