ڈائری دا پنا: 22۔۔۔ رفعت عباس

اساں کاسبو ہاسے۔ایں کرہ ارض دا ہک گوٹھ جیڑھا کارونجھر تے رِݨ آف کچھ دے وچالے پیا وسدا ہا۔جتھاں اج اسمان دا رنگ پیلا ہا تے میگھواڑاں دیاں چتھاں تے موریں دی نیلی تے ساوی ہک جھال ہئی۔کاسبو دیاں سڑکاں ہی کاسبو دیاں ڳلیاں ہَن۔ڈوہیں پاسوں کچے گھراں دے اساں اگوں لنگھے۔ کہیں کہیں جاہ کندھاں دروازے تے ڈھیر جاہیں جھاڑیاں دے لوڑھے مارے ہوئے۔کہیں کہیں جاہ پکے گھر تے گھراں تے نقش نگاریاں۔اساں ہک عمراں توں ایں گوٹھ وچوں پئے لنگھدے ہاسے۔اِنہاں بالیں نال ڄائے ہاسے۔اِنہاں بُڈھڑیاں نال ہنݙ ڳئے ہاسے۔جیڑھے ویلے تریمتیں دیاں چُنیاں چولیاں تے موریں دے پکھ پئے بݨَدے ہَن اساں اتھاہیں ہاسے۔اساں ایں کائنات دے دڳ تے پئے ٹردے ہاسے۔ایں گوٹھ وچ چڑیاں ہَن لالیاں ہَن کاں ہَن کُکڑیں تے بطخاں ہَن۔نت دے سُونہے وَݨ ہَن۔نت دی سُونہیں غربت ہئی۔غربت دی سانجھ ہئی جیڑھی کاسبو تے تحصیل شجاعباد وچ میݙی وستی چک آر ایس کوں پئی ڳنڈھیندی ہئی۔اساں اِتھاں کہیں نویں داستان وچوں غربت تے سانجھ دا سوال بُجھݨ آئے ہاسے۔اساں پروبھرے ایں گوٹھ کاسبو وچ اوں ٻَلاں دا ناں بُجھݨ آئے ہاسے جیندی پُچھ اساں گوٹھ در گوٹھ ڈِٹھی ہئی۔اساں غربت دے رومان توں نسردی حیرت کوں مکلاوݨ کیتے آئے ہاسے۔اساں اوں مسرت دی ڳول وچ آئے ہاسے جیڑھی حیاتی کوں برابری وچ ڳنڈھیندی ہے۔ کاسبو دی ابدیت وچ ایں پراݨے سوال دا جواب ہئی۔میݙی بُکل دے ٻہوں سارے چور پئے پکڑیندے ہَن۔میں اپݨے رومان توں ٻئے ہک رومان دی اُساری وچوں باہر پیا نکدا ہم۔میں لوکیں دے ݙکھ تے اُنہاں دی مونجھ توں حیرت تے مسرت کشید کرݨ دے بھوگ توں واندا پیا تھیندا ہم۔مور سڑکاں توں اُݙ کے چھتاں تے پئے لاہندے ہَن۔اگوں دکاناں تے میگھواڑیں دی ہمیشگی دے گھر ہَن۔اساں ڈیو جی دے ٻوہے اڳوں پُڄ ڳئے ہاسے۔

ویب ڈیسک

See author's posts