اے چھڑا کیپیٹلزم نئیں، امپیریلیزم وی ہے !۔۔مشتاق گاڈی

کرونا وائرس دی وبا نال پیدا تھیوݨ آلے معاشی تے مالی بحران دے نتیجے وچ دنیا بھر دے پرائیویٹ مالی اداریں 92 ارب ڈالر سٹاک تے بانڈ کنیں کڈھ اپݨے ہتھیکے کر گیدھن۔ ایندے نال تریجھی غریب دنیا وچ ڈالر۔۔ سرمایہ تاریخی اُڈاری بھرکنیں پُھر تھیوݨ لڳ پئے تے اںہیں دا مالی نظام یا ڈھائے چُکے یا ڈھاوݨ دے قریب ہے۔ جݙاں جو نارتھ ۔۔۔ امیر ملک اپݨی معیشت کوں سہارا ݙیوݨ کیتے پبلک فنانس وچوں سرمایہ انجیکٹ کرݨ دی سوکھی پوزیشن وچ ہن تے اُنہیں ایں حوالے نال کم وی شروع کر ݙتے۔ امریکا وچ ایں جاری معاشی مالی بحران نال نبرݨ کیتے 2 کھرب ڈالر مختص کیتے ڳئین۔ صدر ٹرمپ ہک ٻیا ننواں پیکج وی تیار کیتی ٻیٹھے۔ جرمنی 800 ارب ڈالر مختص کیتن۔ جاپان 1 کھرب ڈالر مختص کر چُکے۔ جݙاں جو چین ایں حوالے نال ٻہوں اڳوں ہے۔ چینی حکومت اپݨی اندرونی معیشت تے عالمی سرمایہ کاری کوں امداد ݙیوݨ کیتے 7 کھرب ڈالر مختص کیتن۔ انگلینڈ، فرانس، روس تے ٻئے اینجھے نارتھ دے امیر مُلک وی پچھوں نہ رَہسن۔

 ۔۔ ایں حوالے نال آئی. ایم۔ ایف لگ بھگ 1 کھرب ڈالر تیار کر چُکے۔ مطلب غلامی دا ہک ننواں طوق تیار تھیندا پئے۔

پچھلے کُجھ ݙینہیں وچ ٻہوں سارے لوکیں کیپیٹلزم اُتے ٻہوں جائز لعن طعن کیتی ہے پر ساکوں اوندے امپیریلسٹ روپ کوں نئیں بُھلݨا چاہیدا جیڑھا اڄ ٻہوں ودھیک نُشابر تھی چُکے۔ پراݨے کالونئیل غیرب ملکیں وچ فرانز فینن دا بھوت اڄ وی پھردا کھڑے۔

ویب ڈیسک

See author's posts