مکالمہ ہیک مذہبی بندہ ڈوجھے مذہبی بندے نال الویندے۔۔۔ذلفی

مکالمہ
ہیک مذہبی بندہ ڈوجھے مذہبی بندے نال الویندے۔
پہلا بندہ۔لوکیں دا ایمان کمزور تھی ڳئے۔
ڈوجھا بندہ۔ہا اے قیامت دی نشانی حے لوک اللہ آؤ نئیں ڈردے وائرس آؤ ڈرے پئین۔
پہلا بندہ۔جی ہا پتا نئیں اللہ سائیں کوں اساں کیویں منہ ڈکھلائیسوں۔
ڈوجھا بندہ۔ساکوں ہر حالت اچ لوکاں کوں تبلیغ جاری رکھݨی حے اے دنیا تاں عارضی حے اصل تے دائمی دنیا واسطے بندے کوں کجھ کرݨا چاہیدے۔
ایں دوران ہیک تریجھا بندہ وی آ ویندے۔
تریجھا بندہ۔ او ایویں پریں کولو سلام کریندے پر تبلیغی حضرات اوکوں ویڑھ ویندن تے اوکوں اللہ کولو ڈرائیندن۔
پہلا بندہ۔ ہتھ اگاں کر کے اوکوں آھدے السلام علیکم و رحمت اللہ ۔۔۔
ڈوجھا بندہ۔اوکوں گلے لاوݨ دی کوشد کریندے تے آھدے سب کجھ اللہ دے ہتھ حے اساں کولو ڈردا کیوں پائیں۔
تریجھا بندہ۔سائئں اللہ پاک عقل وی ڈتی حے کجھ ایکوں استعمال کر گھنوں تاں کیا حرج حے ایندے نال اسلام کوں یقین کرو کوئی خطرہ کائینی۔
پہلا بندہ۔ اللہ خیر کریسی اتنا ڈرو نا اے تاں یہودیں دی سازش حے ساکوں اللہ تیں یقین حے اے وائرس ساڈا کجھ نئیں کر سگدا۔ویسے وی دنیا اچ کتنا لوک بنہیں بیماریاں کولو مر ویندن۔ات سارا ڈرامہ حے۔
ایں دوران ہیک چوتھا بندہ وی مکالمے اچ شامل آ تھیندے جیرھا ہیک ڈاکٹر وی حے۔تبلیغی اوکوں وی ولا چاڑ ویندن۔
ڈاکٹر۔اوئے اللہ دے پیاریو اتنا نزدیک نہ کھڑو وائرس کولو خطرہ حے ہیک ٻائے کولو بچ کھڑو۔۔
ڈوجھا بندہ۔ میکوں اے ڈس ڈاکٹر صاحب کرونا وائرس کولو زیادہ تاں بندے کینسر، ایڈز، ملیریا تے ڈوجھیں بیماریاں آؤ مر وئندن۔انھاں دے بارے تاں اتنا واویلہ نئیں تھیندا۔اے سارا ڈرامہ میڈیسن ویچݨ واسطے کیتا ویندا پائے۔امریکہ اے وائرس پھیلائے تے ہݨ آپ وی بھگتیندا پائے اصل اچ او چین دی معیشت کولو ڈر کے اے سارا دھندہ کیتے۔
ڈاکٹر۔وائے اللہ دے بندے او تہاڈی ڳالھ ٹھیک حے بنہیں بیماریاں کولو ہزاراں لوک روزانہ مردن پر اے بیماری انھاں آؤ مختلف حے۔
پہلا بندہ۔ ایندا وی ڈیتھ ریٹ پنج فیصد حے سو بندیں کوں تھیوے تاں بنج بندے سارے مردن جیندی کھٹی آئی کھڑی حے اوکوں کوئی نئیں بچا سگدا میڈے اللہ نے ہر ذی روح دی موت دا ہیک وقت مقرر کر ڈتا حے او کرونا نال نہ مرسن تے کہیں ٻئی بیماری نال مر ویسن۔
ڈاکٹر۔ تہاڈی گالھ وی ٹھیک حے پر اگر فرض کرو ایں وائرس دے خلاف احتیاط نہ کیتی ونڃے تے اے ہیک مہینے دے اندرو دنیا دی پنجاہ فیصد آبادی کوں اپݨی لپیٹ اچ گھن گھنسی۔تے اے صلاحیت کہیں بئی بیماری اچ کائینی جو او اتنا تیزی نال پھیلے۔تہوں آھدے ہیں احتیاط کرو۔اگر اے پنجاہ فیصد آبادی کوں تھی ڳئی تے ول کتنا لوک مر ویسن تیکوں اندازہ حے لگ بھگ اسی کروڑ بندہ چاہتا ویسی۔ تے ولا ایں وائرس دے خلاف انسانی قوت مدافعت پیدا تھیوݨ واسطے کم از کم ڈاہ پندرہ سال لگسن۔تے آپ سوچ انھاں پندرہ ویہہ سالاں اچ کتنا لوک بچ ویسن۔؟؟؟
پہلا بندہ۔تیڈا ایمان کمزور حے تیڈی اللہ تیں توکل کائینی تیکوں تہوں ڈر لڳا ودے ۔تساں اللہ کوں اپنا دوست بناؤ چا شام کوں مولانا طارق جمیل صاحب دا بیان حے ساڈے کٹھے جلو ول تہاکوں دنیا ایویں نہ لگسی وائرس شائرس دا ڈر وی نکل ویسی۔
ڈاکٹر۔تساں جلو سائیں میں شام کوں ا ویساں۔مولانا صاحب نیک بندے ہن اللہ اساں ساریں کوں ایمان دی طاقت ڈیوے۔
پہلے تے ڈوجھے بندے ہیک زبان تھی کے آمین آکھے تے او اگلے دروازے تیں لگے گئین۔
ڈاکٹر۔تھوڑی دور ونڃ کے اندرو اندرو اللہ دا شکر ادا کیتس تے اتوں دے ڈٹھا اوکوں ایویں لگے جیویں آسمان اوندے سر تیں ڈھاندا پیا ہووے

dailyswail

See author's posts