12مارچ2020:اے پی پی دیاں سرائیکی خبراں

حکومت ولوں20 ہزار گھراں دے7 منصوبیاں دی شروعات 50 لکھ گھربنڑاونڑ دے خواب دی تعبیر سانگے پہلی بلانگھ اے،وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان دا ٹویٹ

اسلام آباد ۔ 12 مارچ (اے پی پی)وزیراعظم دی معاون خصوصی برائے اطلاعات و نشریات ڈاکٹر فردوس عاشق اعوان آکھیے جو وزیراعظم عمران خان لوکاں کوں اپنڑے گھر بنڑاونڑ دے خواب دی تعبیر ڈیندے پین،20 ہزار گھراں دے7 منصوبیاں دی شروعات 50 لکھ گھربنڑاونڑ دے خواب دی تعبیر سانگے پہلی بلانگھ اے،گھٹ آمدن آلے پاکستانیاں دا معیار زندگی اچا کرنڑ وزیراعظم عمران خان دا مشن اے، پاکستانیاں کوں چھت ڈیونڑ پی ٹی آئی دے منشور دا حصہ اے۔ہک ٹویٹ اچ انہاں آکھیے جو انشاءاللہ عوام دی ہر سک پوری تھیسی اتے او اپنڑے گھر اچ رہ سگسن،منصوبے نال تعمیراتی شعبہ ترقی کریسی اتے بیاں چالہی صنعتاں کوں وی ترقی ملسی۔انہاں آکھیے جو وزیراعظم عمران خان قوم دا احساس رکھنڑ آلے رہنما ہین جئیں کھلے آسمان ہیٹھ سمنڑ آلیاں کوں ٹھٹھردی سردی اتے گرمی توں بچاونڑ کیتے پناہ گاہیں ڈتن۔

وفاقی اتے صوبائی حکومتاں7 ہفتے توں کورونا وائرس نال نمٹنڑ دی تیاری اتے رسپانس تے کم کرینداں پین،وائرس توں بچاو کیتے کم جاری راہسی،وزیر اعظم دے معاون خصوصی برائے قومی صحت ڈاکٹر ظفر مرزادا ٹویٹ

اسلام آباد ۔ 12 مارچ (اے پی پی) وزیر اعظم دے معاون خصوصی برائے قومی صحت ڈاکٹر ظفر مرزاآکھیے جو عالمی ادارہ صحت کورونا وائرس کوں وبائی مرض قرارڈتے،وفاقی اتے صوبائی حکومتاں7 ہفتے توں کورونا وائرس نال نمٹنڑ دی تیاری اتے رسپانس تے کم کرینداں پین،وائرس توں بچاو کیتے کم جاری راہسی۔اے گالھ انہاں ہک ٹویٹ اچ آکھی جوحکومت لوکاں کوں کروناوائرس توں بچاونڑ کیتے سارے اقدامات جاری رکھسی،جگ اج وی رل مل تے کم کرنڑ تے اپنڑے لوکاں کوں متحرک کر تے ایندے بچاو کیتے اقدامات کر سگدے،ایں سانگے عوام دی تحفظ کیتے ہنگامی صورتحال سودھا احتیاطاں ودھاونڑدی لوڑھ اے۔

نیب قوانین اچ ترمیم دا مقصد احتساب تے سمجھوتہ کرنڑاصلوں نئیں ،صرف اوہاترمیم کیتی ویسی جیڑھی ملکی اتے عوامی مفاد اچ ہوسی،وفاقی وزیر قانون بیرسٹر فروغ نسیم دی سپریم کورٹ دے باھرو میڈیا نال گالھ مہاڑ

وفاقی وزیر قانون بیرسٹر فروغ نسیم آکھیے جو نیب قوانین اچ ترمیم کرنڑدا مقصد اے اسلوں نئیں جو احتساب تے کوئی وی سمجھوتہ کر گھدا ونجے۔اے گالھ انہاں سپریم کورٹ اچ نیب اچ بھرتیاں دے حوالے نال کیس دی سماعت توں بعد میڈیا نال گالھ مہاڑ اچ آکھی۔انہاں آکھیے جو نیب قوانین اچ ترمیم دا مقصد اختیارات دا ناجائز استعمال روکنڑ اے ،اینجھی کوئی وی ترمیم نہ گھن آئی ویسی جیڑھی ملکی مفاد اتے عوام دی فلاح دے خلاف ہووے ۔انہاں آکھیے جو پلی بارگین اتے رقوم دی رضاکارانہ واپسی دی شق ختم نئیں تھیونڑی چاہیدی،صرف اوہا ترمیم ہی کیتی ویسی جیڑھی ملک دے مفاد، قانون و آئین دے مطابق ہووے۔فروغ نسیم آکھیے جو مسلم لیگ اتے پاکستان پیپلز پارٹی اپنڑے دور اچ نیب قوانین اچ ترمیم نئیں کر سگیاں، اج انہاں کوں ایندے اچ ترمیم اتے اعتراضات کرنڑچنگے نئیں لگدے۔

کروناوائرس دا ڈر؛امریکی صدرڈونلڈ ٹرمپ امریکہ توں یورپ سفر تے ہک مہینے تئیں دی پابندی لا ڈتی

واشنگٹن ۔ 12 مارچ (اے پی پی)کورونا وائرس پورے جگ اچ ڈر بلھا ڈتے اتے ہنڑ امریکاوی اپنڑے شہریاں دی یورپ سفر اتے یورپ توں امریکہ آونڑتے ہک مہینے تئیں دی پابندی لا ڈتی اے بھل ایں پابندی دا اطلاق برطانیہ سفر کیتے نہ ہوسی۔کرونا وائرسن نال چین، ایران اتے ہنڑ اٹلی سب توں ودھ متاثر ہیں جڈاں جو اے ہنڑ تئیں جگ دے سو توں ودھ ملکاں اچ پھیل چکیے۔ایں وائرس امریکا اتے یورپ اچ وی پیر جماونڑ دی کوشش شروع کر دٹی اے جیں پاروں ایندے اثرات توں بچنڑ کیتے امریکی صدر ٹرمپ یورپ توں امریکہ دے سفر تے تریھ ڈینھ دی پابندی لیندے آکھیے جو اے فیصلہ امریکیاں دے این وبا توں بچاو کیتے چاتا گئے،آندے 30 ڈینھ کیتے یورپ توں امریکہ آونڑ آلیاں کیتے ہر قسم دا سفر معطل راہسی بھل انہاں سخت اتے ضروری پابندیاں دا اطلاق برطانیہ تے نہ تھیسی ۔ٹرمپ ا ٓکھیے جو انہاں پابندیاں دا اطلاق جمعے دی رات بارہاں وجے توں کیتا ویندا پئے۔

ہولی ووڈ اداکار ٹام ہینکس اتے انہاں دی اہلیہ وی کروناوائرس نال متاثر

واشنگٹن ۔ 12 مارچ (اے پی پی)ہولی ووڈ اداکار ٹام ہینکس اتے انہاں دی اہلیہ وی کروناوائرس نال متاثرتھی گین اتے انہاں اچ کرونادی تشخیص تھئی اے۔ایندا اعلان اداکار ٹام ہینکس آپ ہک ٹویٹ اچ کیتے۔انہاںا ٓکھیے جومیں اپنڑی زال اداکار ہ وگلوکارہ ریٹاولسن نال آسٹریلیا اچ ہاں جتھاں اساں کجھ ڈینھ توں بہوں تھکاوٹ،نزلہ،جسم اچ درد دے نال نال گھٹ ودھ بخار محسوس کیتے اتے ٹیسٹ کراونڑ تے کرونا تشخیص تھئے۔ڈاکٹراں علاج کیتے انجھ رکھیا ہوئے تاں جو بنھاں داتحفظ یقینی بنڑایا ونجے بھل میں مداحواں کوں اپنڑی صحت بارے ڈسینداں رہ ویساں۔

سعودی عرب دا کئی سال بعد تیل دی پیداواری صلاحیت ودھاونڑ دا اعلان

اسلام آباد ۔ 12 مارچ (اے پی پی)سعودی عرب آکھیے جو او ہک ڈھاکے بعد پہلی واری تیل دی پیداوارودھاونڑ دا ارادہ رکھیندے۔ایں توں پہلے ہی سعودی عرب اچ تیل دی سپلائی اچ ریکارڈ ودھارا کر ڈتا گئے۔جگ دے 100توں ودھ ملکاں اچ پھیلنڑ آلے کورونا وائرس تیل دی صنعت تے وی بہوں ودھ اثر سٹیے اتے مارکیٹ شیئر دے جھیرے اچ خام تیل دا ملھ کئی گناتلے آ گئے۔غیر ملکی خبر رساں ایجنسی ‘رائٹرز’ دے مطابق سی ای او امین ناصر ہک بیان اچ آکھیے جو ‘سعودی عرب دی وزارت توانائی تیل پیدا کرنڑ آلی سعودی کمپنی آرامکو کوں یومیہ پیداوار ہک کروڑ 20 لکھ بیرل توں ودھا تے ہک کروڑ 30 لکھ بیرل کرنڑ دی ہدایت کیتی اے۔

عالمی ادارہ صحت نویں کورونا وائرس کوں عالمی وبا قرار ڈے ڈتے

جنیوا ۔ 12 مارچ (اے پی پی)عالمی ادارہ صحت (ڈبلیو ایچ او)نویں نوول کورونا وائرس کوں عالمی وبا قرار ڈیندے آکھیے جو ایندے تے قابو پاونڑ کیتے رل مل تے کم کرنڑ دی لوڑھ اے جو ایں ویلھے اے وبا جگ دے 100توں ودھ ملکاں اچ پھیل چکیے۔ڈبلیو ایچ او ولوں عالمگیر وبا دی اصطلاح ‘کہیں نویں مرض دے پورے جگ اچ پھیلنڑ،ایندی شدت ،جغرافیائی خطریاں اتے معاشرے دے اثرات دے تحت استعمال کیتی ویندی اے۔عالمی ادارہ صحت وبا دے تیزی نال پھیلنڑتے چنتا کیتے ۔ایں سانگے ڈبلیو ایچ اودے ڈائریکٹر جنرل ٹیدروس ادہانوم جنیوااچ پریس بریفنگ ڈیندے آکھیے جو ‘کووِڈ 19 دی درجہ بندی عالمگیر وبا دے طورتے کیتی گئی اے۔

حرم مکہ اچ رہنمائی اتے معلومات آلیاں ٹچ سکریناں عارضی طورتے بند کر ڈتیاں گین

مکة المکرمہ ۔ 12 مارچ (اے پی پی) مسجد الحرام مکة المکرمہ اچ ساریاں ٹچ سکریناں عارضی طور تے بند کر ڈتیاں گین۔اے فیصلہ کورونا وائرس توں بچاو کیتے احتیاطی تدابیر دے طورتے کیتا گئے ۔اے سکرینز رہنمائی اوتے معلومات کیتے داخلی رستیاں تے لگیاں ہوئن۔اے اعلان مکہ اتے مدینہ اچ مسجد الحرام اتے مسجد نبوی دے معاملات دی جنرل پریذیڈنسی اتھارٹی کیتے۔ڈسایا گئے جو کجھ سکریناں ریموٹ نال کنٹرول کیتاں ویسن۔ایں سانگے ڈوہاں مسیتاں دے کارکناں کیتے فنگر پرنٹس نال سنجانڑ وی وقتی طورتے معطل کرڈتی گئی اے۔

نیپرا فیول ایڈجسٹمنٹ دی مد اچ بجلی دی قیمت بدلنڑ بارے درخواستاں دی سماعت 25 مارچ کوں کریسی

اسلام آباد ۔ 12 مارچ (اے پی پی)نیشنل الیکٹرک پاور ریگولیٹری اتھارٹی (نیپرا) ڈسٹری بیوشن کمپنیاں ولوں فیول ایڈجسٹمنٹ دی مد اچ بجلی دی قیمت اچ رد وبدل بارے درخواستاں دی سماعت 25 مارچ کوں کریسی۔ڈسٹری بیوشن کمپنیاں سنٹرل پارو پرچیزنگ ایجنسی (سی پی پی اے) دے ذریعے فیول ایڈجسٹمنٹ دی مد اچ درخواستاں جمع کرائن اتے ایں سانگے بجلی دی قیمت اچ 2 روپے فی یونٹ فیول ایڈجسٹمنٹ دی مداچ ودھارے دی درخواست کیتی اے۔

سینیٹ دی قائمہ کمیٹی برائے پٹرولیم دا اجلاس سنوار کوں تھیسی

اسلام آباد ۔ 12 مارچ (اے پی پی) سینیٹ دی قائمہ کمیٹی برائے پٹرولیم دا اجلاس سنوار کوں پارلیمنٹ ہاﺅس اچ تھیسی۔اجلاس دی صدارت چیئرمین سینیٹر محسن عزیزکریسن۔اجلاس اچ ریکو ڈک دے معدنی ذخائر اتے معاہدے بارے امور داجائزہ گھدا ویسی۔ وزارت پٹرولیم اتے بئے متعلقہ اداریاں دے افسران کمیٹی کوں بریفنگ ڈیسن۔

قومی اسمبلی دا اجلاس (اج)جمعے دی سویل ساڈھے ڈاہ وجے ولا تھیسی

اسلام آباد ۔ 12 مارچ (اے پی پی) قومی اسمبلی دا اجلاس (اج)جمعے دی سویل ساڈھے ڈاہ وجے ولا تھیسی۔اجلاس دی صدارت سپیکر قومی اسمبلی اسد قیصر کریسن۔ اجلاس اچ وقفہ سوالاں سودھا ایجنڈے دے بئے امور نمٹائے ویسن۔

سوئی نادرن اتے سوئی سدرن آندے مالی سال توں گیس دا ملھ ودھاونڑ دی درخواستاں جمع کرا ڈتن

اسلام آباد ۔ 12 مارچ (اے پی پی) سوئی نادرن اتے سوئی سدرن آندے مالی سال اوگرا کوں مالی سال توں گیس دا ملھ ودھاونڑ دی درخواستاں جمع کرا ڈتن۔انہاں کمپنیاں لائن لاسز اتے گیس چوری پاروں سالانہ ریونیو اچ کمی سانگے ایں سال یکم جولائی توں گیس دا ملھ ودھاونڑ دی درخواست کیتی اے اتے اپنڑیاں انجھ انجھ درخواستاں اوگرااچ جمع کرائن جیندے تے اوگرا گیس صارفین اتے عام لوکاں سودھا بئے سارے متعلقہ فریقین توں آرا منگ گھدی اے جیندا حتمی فیصلہ باقاعدہ عوامی سماعت دے بعد کیتا ویسی۔

ایں مالی سال ترسیلات زر دا حجم 22 ارب ڈالر توں و دھ رہنڑ دا امکان اے، ذرائع وزارت خزانہ

اسلام آباد ۔ 12 مارچ (اے پی پی)ایں مالی سال ترسیلات زر دا حجم 22 ارب ڈالرتوں ودھ رہنڑ دا امکان اے ۔وزارت خزانہ دے ذرائع دے مطابق 2018-19ءاچ بیرون ملک راہنڑ آلے پاکستانیاں ولوں بھجوائی گئی رقوم دا حجم 21 ارب 80 کروڑ ڈالر ریکارڈ تھئے اتے ایندے اچ 2017-18ءدے مقابلہ اچ 10 فیصد ودھارا ریکارڈ کیتا گئے۔ایں مالی سال دے پہلے 8 مہینے اچ پچھلے مالی سال دی ایں مدت دے مقابلہ اچ 5.4 فیصد ودھارے نال ترسیلات زر دا حجم 15 ارب 10 کروڑ ڈالر ر ہے۔ ترسیلات زراچ ودھارے کوں ڈیہدے ہوئے مالی سال 2019-20ءاچ مجموعی حجم 22 ارب ڈالرتوںو دھنڑ دی توقع اے۔

پی ایس ایل فائیو، ملتان سلطانز پوائنٹس ٹیبل تے سب توں اگو

اسلام آباد ۔ 12مارچ (اے پی پی) پاکستان سپر لیگ دے پنجویں ایڈیشن اچ ملتان سلطانز دی ٹیم 12 پوائنٹس نال سرفہرست اے جئیں پہلے ہی پلے آف کیتے کوالیفائی کر گھدے۔ملتان سلطانز ہنڑ تئیں ٹورنامنٹ اچ 8 میچز کھیڈ تے 5 جیتن اتے ہک اچ ہار تھئی اے ۔ڈوجھے نمبر تے پشاور زلمی 9اچوں 4 میچ جیت تے 9 پوائنٹس گھدن۔لاہور قلندرز دی ٹیم 8 پوائنٹس نال تریجھے نمبر تے موجود اے جئیں پچھلے مسلسل ترائے میچ جیتن۔ایویں ہی اسلام آباد یونائیٹڈ، کراچی کنگز اتے کوئٹہ گلیڈی ایٹرزدیاں ٹیماں 7 ، 7 پوائنٹس نال بالترتیب چوتھے، پنجویں اتے چھیویں نمبر تے ہین۔

ویب ڈیسک

See author's posts