ما بولی۔۔۔ حسن مرتضی

اج ما بولی دا عالمی ڈھینہ اے پر اکثریت کوں پتا ای نا ہوسی جو ایندے مناوݨ دے پچھوں کیا قصہ اے ؟

پاکستان بݨن تو بعد جناح فیصلہ کیتا جو اردو ہی سرکاری زبان ہوسی. اکثریت دی زبان بنگالی کوں کئی سرکاری سٹیٹس ناملیا. جناح صاحب دے ہوندیں وی مظاہرے تھئے تے بعد اچ 1952 اچ بہوں وڈیاں ریلیاں جلوس نکھتے جیندے وچ ڈھاکہ یونیورسٹی دے طلبا تے عوام شامل ہئی۔

ریاستی جبر دا بدترین مظاہرہ کیتا گیا فائرنگ کیتی گئی تے بہوں دھرتی زادے شہید تھئے ۔ جیندی یاد اچ اج دا ڈھینہ منایا ویندے۔

اے انھاں واسطے وی سبق اے جیہرے بھٹو کو بنگلہ دیش دی علیحدگی دی وجہ منیندن کیا اے کم ای بھٹو کرایا ہئی ؟
خیر گالھ تے ہے جو اوں ڈینہہ  کنے اج تک ریاست دا رویہ بدلیا نئیں ۔

ہر خطے دی قوم دی ما بولی جبر دا شکار اے ۔ فوک تے اپݨی زبان دے ترجمان شاعر مردے پئن ۔ ہک فضا بݨائی گئی جو اردو الاوݨ تہذیب دی علامت اے ما بولی جیرھا الیسی او جاہل دیہاتی ہے ۔

بہوں سارے لوک شہریں ونج تے تعارف ای اردو سپیکنگ ہووݨ دا کریندن۔ گھراں اچ ما بولی دا قبرستان اے ۔

ڈوجھی طرفوں غیر محسوس طریقے نال اردو کوں ایں طراویں پروموٹ کیتا ویندے جو مقامی زبان دا شاعر جے تلا وی سوہݨا لکھے او اوویں میلے کپڑے پاتی رکھدے ساری حیاتی اردو اچ لکھݨ شروع کرو تے اسلام آباد لاہور دے محفلیں دے در تہاݙے تے کھل ویسن ۔

سرائیکی نال تے ہک وکھرا عذاب تھئے ۔ پہلے تے ساکوں منواوݨا پئے گئے جو اساں وی انج زبان رکھدوں کوئی لہجہ وغیرہ نئیں۔ ہݨ وی بہوں سارے لوک نئیں منیندے پر فرق نئیں پوندا۔

حکومت سرپرستی تے جݙاں کرے وزیراعلیٰ بزدار کوں کھݙوݨا بݨا تے سرائیکی وسیب اچ ولا ولا بلوچ کلچر ڈے منا تے کیا پیغام ݙتا ویندا پے ؟

انھاں حالات اچ سنجیدہ بزرگ تے تمام سرائیکی کارکناں کو کٹھے تھی تے گالھ مہاڑ کرݨی پوسی ۔ مابولی اچ نویں ادبی تجربے نویاں گالھیں نویں ادبی فورم بݨاوݨے پوسن ۔ اتے اے رویہ ختم کرݨا پوسی جو اساں سرائیکی الایا تے جاہل سڈیسوں تے سرائیکی لکھیا تے پذیرائی نا ملسی۔

ہک چار پنج سال دا ٻال جیرھی عمرا اچ بولݨ سکھدے اوندے نال اردو الائی ویندی اے۔ اردو تے او ساری حیاتی سکول کالج یونیورسٹی اچ سکھ ویسی کیا مابولی سکھݨ واسطے کئی قاعدہ ہے؟ نصاب ہے ؟ سکول ہے؟
بلکل کینی ۔

ویب ڈیسک

See author's posts