پراپیگنڈہ یا ول نفرت؟ حسن مرتضی

تخت لہور اچ ائے ہوئیں چار سال تھیوݨ آلے ان ۔ عام لہوری کنے گھن تے یونیورسٹی دے پڑھے لکھیں دماغیں تک ہک گالھ جیہری شدت نال محسوس تھئی او اے جو تقریباً سبھ لوک (بیشتر لیفٹسٹ کامریڈز وی) سندھ کوں جاہل سمجھدن ۔ بلوچ کوں دہشتگرد منیندن ۔
پہلا مسئلہ انھاں کو جیہرھا پوندے او بھٹو نال ای ہوندے جو ڈیکھو بھٹو زندہ اے سندھی مر گئے۔ آپ بھانویں 40 سال کنے ضیاالحق دے وارثیں دا کھٹیا کھندے تباہ تھئے لاتھن ول وی بھٹو کوں مندا کڈھݨ ضروری سمجھدن جیندی پارٹی 1977 دے بعد پنجاب حکومت سنبھالی وی نئیں ۔
ول اتھو چپ تھیسن تے کالا باغ ڈیم تے دھاڑ پٹ شروع کر ڈیسن ۔ وڈے پروفیسر دانشور وی اتھاں عجیب جئیں لطیفے سݨوا تے کھلسن جاہلیت دا طعنہ ڈیسن ۔ جو سندھی سمجھدن پاݨی اچو طاقت پنجاب کڈھ گھنسی ۔ ڈیم دریا دا پاݨی پی ویندے ۔ سندھ دے انجینئر وی جاہل ان ۔ ہر سال کئی ملین ایکڑ فٹ پاݨی اساں سمندر برد کر ڈینڈوں ۔
جے ایویں ہے تے ول سمندر ای زرداری دا ایجنٹ ہوسی تے زرداری دے آکھیے تے ترائے تحصیلیں دے ڈیلٹا دے رقبے تے قبضہ کریندا پیا ہوسی ول زرداری ایکوں ویچ تے کھاسی ۔
زرداری تے پنجاب اچ جیویں پوٹریٹ کیتا گئے ۔ پنجاب دے ڈاکو کو جو آکھو زرداری کیا ہے اگو لڑھ مریسی او وڈا ڈاکو اے۔
اے سبھ کجھ بہرحال جئیں وی شروع کیتے ہن نفرت دا دریا چھولیاں مار تے وفاق کوں تروڑ رکھسی ۔ مقتدر حلقیں جیہرھیاں سٹوریاں گھڑ تے نصاب اچ پاتن تے میڈیا تے پھیلائن ہݨ سر درد بݨسن ۔ وفاق اوں صورت قائم رہندے جیہرھے ویہلے سیاسی جدوجہد مشترکہ ہووے ۔ ہر قومیت دے علاقے اچ مخصوص سیاسی سوچ پروان چڑھا تے جیہرھی بئے نال نفرت پیدا کیتی گئی اے ہݨ قوم پرستی وفاقی جماعتیں اچ وی سرایت کر ڳئی اے ۔
ہر صوبے وچ اپݨی جماعت اے کئی جماعت پورے پاکستان دے مینڈیٹ دی دعویدار نئیں رہ ڳئی. ہک جماعت کوں مکاوݨ دے چکر اچ جیہرھا نفرت دا سمندر اسلام آباد دے کوڑھ مغز افسریں بݨا کھڑائے او ہݨ مکݨ آلا کوئنی ۔
جے وفاق بچاوݨے تے قومیتیں کوں عزت ݙتے تے کہانیاں گھڑݨ بند کرݨیاں پوسن ۔ سچائیاں سمجھاوݨیاں پوسن ۔ پنجاب دے واسیں کوں ڈسݨاں پوسی جو زرداری آئین دا جمہوریت دا محافظ اے ۔ سندھی اپݨی تہذیب دے وارث ان۔ کالا باغ ڈیم پاݨی دا راہ موڑݨ کیتے ہے اتے کوٹری توں اگاں پاݨی نئیں پجدا ۔ بلوچ بکھ مردے تہوں رایفل چاتی کھڑے ۔ پٹھاݨ شناخت منگدن ۔ تے ہک اینجھی بے وس قوم وی لاتھی اے جیندے منہ تے پنجابی دا ٹھپہ ٹھوک تے اوندی دھرتی کوں ݙو سو سال کنوں کالونی بݨایا ڳئے۔

ویب ڈیسک

See author's posts