طلبا یکجہتی مارچ تے جتھاں انتہاپسند قدامت پرستیں تنقید دے کہاڑے چلائے اتھاں ترقی پسند وی انھاں کو فیشنی انقلابی، چرسی ، برگر انقلاب آکھیا۔
پیپلز پارٹی کوں ما پیو سمجھݨ والے لوک میں سمیت ، انھاں دے زرداری اتے بھٹو مخالف نعریں تے ناراض وی تھیے اتے سخت زبان وی ورتی ۔
پر ہک سوہݨی گالھ اے ہے جو اے نوجوان اسٹیبلشمنٹ روایتی سیاست اتے معاشرے دے جبر دے خلاف اٹھین مشال خاں دا نعرہ لئی ودن۔ میں خود لہور مارچ اچ شریک رہیاں ۔ جتھاں ہر علاقے دے ترقی پسند طلبا شریک تھئے۔
گلگت بلتستان آلے اپݨے حقوق دی آواز چیندے ودے ہن. فاٹا آلے دا سنگے آزادی دہ نعرہ لاتے مست ہن ۔ اتے مزدور کسان پارٹی دے غریب کسان بھٹہ مزدور یونین دے غریب مزدور امید نال نعرے پیے لیندے ہن ۔
اے ہک خوشگوار ہوا دا جھولا ہئی. اے نوجوان کوئی متشدد نئیں نا سخت گیر مذہبی ان ۔ غیر سیاسی تعلیمی ماحول اچوں ہک آواز اٹھدی پئی اے نوجوان سیاست اچ حصہ منگدے پئن چاہندن جو یونیورسٹی دے کفیٹیریا اچ ول نظریات ڈسکس تھیون ۔ول ہاسٹلز اچ سٹڈی سرکل تھیون وت حقوق دی جدوجہد تھیوے۔
ہک دفعہ اے سیاسی جدوجہد اچ شریک تھیسن انھاں کوں سیاسی تحریک دا پتا لگسی. جماعتاں دا کردار ڈیکھسن تے اندازہ تھیسی کون کتلے پاݨی اچ اے۔ انھاں دے پیپلز پارٹی قیادت بارے نعرے تے ارمان تھئے. پر اے سکھ ویسن ۔ اے عمل آہستہ آہستہ تھیسی ۔
ریاست نے تعلیمی اداریں اچ سیاست تے پابندی ٹھوک تے ہک نسل کوں یوتھیا تاں بݨا ݙتے اتے باقیاں کوں وی سیاست دا اندازہ کینی ۔ جیکر انھاں ایویں سیاسی تحریک جاری رکھی انھاں کو سیاسی رمز اتے ترقی پسند سیاست سمجھ آویسی ۔ انھاں اچوں ݙو کردار نکل آسن یا تے پاکستان دے سیاسی سسٹم کوں سمجھ تے جدوجہد دی سیاسی جماعت نال میل رکھݨ والے یا وت او لوک جیہرے سبھ توں تھک تے ساری زندگی سیاسی عمل تے لعنت بھیج ݙینݙن ۔
انھاں دے باقی نعریں تے گالھ کرݨ بݨدی اے ۔ انھاں نال گالھ مہاڑ کیتی ونڄے پر تعلیمی اداریں اچ یونین آلے معاملے تے ساریں کوں انھاں نال تھیوݨا پوسی ۔ اپݨے اداریں اچ سیاست شروع تھیسی تے ول ای ریاست دے بیانیے کولوں عوامی بیانیہ جیتسی ۔
یہ بھی پڑھیے
”کوئی خواب میکوں اُدھارا نہ ݙیویں“ (وسیب یاترا :12)||سعید خاور
”بدن دی بھوئیں تے مُونجھ دا متام“ (وسیب یاترا :11)||سعید خاور
””سندھو سکرات وِچ اے“ (وسیب یاترا :10)||سعید خاور