لاپتہ پریت دا ویݨ
ݙو مٹھ مٹی بھوئیں تے رکھ کہ
قبر بݨائی ونڄ سڳدی اے
ساݙی باقیات
تصویریں اتے دل توں سوا
کہیں قبرستان اچ دفن نئیں ہوندی
جیکر لاش ولے وی تاں
لاوارثیں دے قبرستان اچ بے نام دفن
ساݙے نال الاوݨ چاہو
یاری لائی ونڄ سگدی اے
ݙو مٹھ مٹی بھوئیں تے رکھ کے
قبر بݨائی ونج سگدی اے
اساں لاپتہ تھیے
اپݨے ہووݨ دے نشان چھوڑ کے
اپݨے پچھوں سنگتاں ساتھ رشتے ناطے
لاپتا تے نئیں تھئے
ساݙے ول ابھرݨ دی
جھمر کھیݙن دی
ہر آس مکائی ونڄ سگدی اے
ݙو مٹھ مٹی بھوئیں تے رکھ کے
قبر بݨائی ونڄ سگدی اے
ساݙے جنازے ہوندے وی نئیں
ساݙے ٻال یتیم نہی ہوندے
او بئی گالھ ساݙے پوترے
ساݙی سک اچ یتیم تھی سگدن
ساݙیاں منگاں ساݙیاں ذالیں
بیوہ نئیں تھیندیاں
کالی شیشے آلی ݙیݨ دے آوݨ توں
اگلے ݙھین بعد
انھاں سبھیں کوں آزاد کریندے ہوئیں
ساری سانجھ مکائی ونڄ سگدی اے
ݙو مٹھ مٹی بھوئیں تے رکھ کے
قبر بݨائی ونڄ سگدی اے
بلیک ہول وچوں
کون بھلا واپس آندے
اساں وی جیکر جیندے ہوئے
ہک عقوبت خانے کولوں بئے تک
نت گھمدے مریندے کٹیندے رہسوں
جیندے دل وچ ساݙی خاطر ذرہ محبت باقی
اوکوں آکھو
ریاست والی ݙیݨ دے اگو
پریت بھلائی ونڄ سگدی اے
ݙو مٹھ مٹی بھوئیں تے رکھ کے
قبر بݨائی ونج سگدی اے
پھل گلاب دے
ساݙے لاپتہ ہووݨ تے کالے نہیں تھئے
چندر وی اوویں پورا اے
پوریاں وچوں ساݙے باجھوں ہکی شخص ادھورا
اوکوں آکھو
کہیں دربار نا منتاں ݙیوے
ریاست آخر ہر ہک صوفی پیر ملنگ توں
طاقت ور اے اسلحہ رکھدی اے
جیکر وت وی اوندے دل کوں چین نا آوے
اپݨے ہاں کوں ساڑ تے کیری
آپ اݙائی ونڄ سگدی اے
ݙو مٹھ مٹی بھوئیں تے رکھ کے
قبر بݨائی ونڄ سگدی اے
یہ بھی پڑھیے
””میاں عثمان عباسی کنوں نکھیڑے دِی ݙَنج“ (وسیب یاترا :9)||سعید خاور
”شیر دل رانی، مائی چھاگلی (وسیب یاترا :8)||سعید خاور
”چِڑیاں اُٹھو کوئی دھاں کرو“ (وسیب یاترا :7)||سعید خاور