گولیاں تے میں کھادیاں ہم۔۔۔ حسن مرتضٰی

"وے گامی آ۔۔۔!! جلدی کر ہک ادھڑا چاہ دا پلوا ول میں شہر ونجݨے ۔۔۔ وے سݨدا ای پئیں ؟”
ریٹائرڈ سپاہی پیریں ݙتا وستی دی کلھی ہوٹل دے باہر لاتھے بنچ تے فوجیاں آلی کار تݨیج تے بیٹھا۔ اپݨے ناں دا وݙا افسوس ہس جو کینجھاں جاہلاں آلا ناں اے ایوب خاں ضیا الحق کیوں نہی رکھیا گیا۔
ہر ویہلے منہ تے کاوڑ آتے فوج سوا ہر کہیں کوں خراب آکھݨ اتے زوریں نال منواوݨ ایندا روز دا کم ہئی۔ کنڈ پچھو وستی ایکوں گیڑی آہدی ہئی البتہ منہ تے فوجی آکھ گھندے ہن۔
"ہا وے یار ۔۔ ہر ٹائم منہ چھل گھندیں کہیں ویہلے سلام ولا گھندے بندہ مٹھا الوا گھندے”.
چاچے بالی اے آکھ تے منہ بݨایا اتے وت تلی تے چاہ دی پھینگ سٹ تے اوندا سواد ݙیکھݨ لگ گیا۔
"واہ واہ کیا خبر اے زرداری بیمار اے مردے اسلوں ۔ چنگا تھئے ملک برباد کر ݙتس سارا پیسہ دب گیے تے ہݨ وی ایکوں حیا نہی اندی” ۔ زہریلی خشی اتے کاوڑ دی کیفیت اچ فوجی اخبار کوں لگا رہیا۔
"یار کجھ انسانیت وی ہوندی اے قیدی دے وی حقوق ہوندن کم از کم ہمدردی تاں ہوندی اے” ۔ میرݨ پیپلز پارٹی دا بھٹو دور کنے وفادار جیالا ہئی تے شئیت ہݨ وستی وچ اوہو ای بچ گیا ہئی اکثر فوجی دے سیاسی بیانات تے چپ رہندا ہئی لیکن اج کاوڑ لکا نہی سگیا ۔
"کینجھی ہمدردی وے ؟ میکوں تاں تیݙے اتے کاوڑ لگدی اے 70 کنے توں غداریں نال ایں ۔ ملک تروڑیے نے ملک دا پیسہ کھا پی گئین۔ ہݨ ہنے کنے خدا بدلے گھندا پئے” فوجی اچی آواز اچ بول پیا۔
"تیݙے نال متھا لاوݨ ہے تے فضول خیر جیرھے فوج چھڑا ائن قانون ڈیون پھاسی لگن حقوق ڈیون او غدار ان کمال اے” میرݨ جھکے الا وچ مسک تے آکھیا۔
"کینجھی پھاسی کیا کارنامے صرف کرپشن کرن سگدن سیاستدان بیا کجھ کینا۔ فوج ہمیشہ ملک بچائے ہنے گندریں کنے۔ باقی فوج کوں چھوڑ توں صرف میں جھئیں سپاہی کوں ݙیکھ گھن”۔ فوجی دی اکھ وچ تھولا تھولا مغروری ائی۔
میرݨ آکھیے ” اچھا ݙسا؟”
"میں بلوچستان اچ 6 جیہاڑے بلوچ دہشت گرداں کنے رہ گیا ہم مار کٹ کریندے ہن او بھوگیم ملک کیتے۔ ول آخری دفعہ میرانشاہ اپریشن تے ݙو گولیاں لگیاں ہن اے کاش دل کنے پریں نا لگدی تے اج شہید وی ہوواں ہا” فوجی پورا جذبات اچ بݙ گیا ۔ اتلا جو بالی اوندے اگو چاہ رکھی تے اوکوں سدھ نا پئی ۔ بئے ݙو ترائے بندے وی اوکوں ݙیکھ تے دل اوکوں بحث دا فاتح بݨائی بیٹھے ہن۔
"اچھا اے تے ٹھیک اے تیݙی پوری قوم تے منت اے۔ اے ݙسا تیݙا افسر کون ہئی؟” میرݨ تجسس نال ہک سوال کر چھوڑیا۔
"یار او میجر ہئی گجراں آلے دا ۔ اعوان ہئی۔ کیا ٹور ہس سوہݨا وی ہئی تے رعب آلا جعان ہئی۔ اتے میݙے زخمی تھیوݨ توں بعد تاں میݙے نال یاری لا گدس ۔ میں ہک ݙو واری اوندی کوٹھی تے گیا ہم لہور افسریں دی کالونی "۔ فوجی ماضی اچ غرق تھی گیا۔
"اچھا اج کل کتھاں ہوندے کیا کریندے ؟” میرݨ بیا سوال اگو کیتا
"او تے وݙے پہنچے اوئے لوک ان۔ اوندا ابا تے میجر جرنل ریٹائر تھیا اتے ماما وی بریگیڈئر ہئی۔ او کرنل تک پج تے ریٹائر تھی پیا ہا بال بچے اوندے کئی باہر ملک ان آپ اتھاں اپݨے دیہات دے پراݨے ݙیرے تے سیاست وی سنبھلیندے شہر کاروبار ان اتے افسریں دی کالونی رہائش ۔ پر سݨیا ہم جو ہک دفعہ اٹیک تھیا ہس شکر اے جو فوجی ہسپتال نیڑے وی ہئی تے ڈاکٹر اتھاں بہترین ہوندن انھاں بچا گھدے”
فوجی گالھ مکائی۔
"اچھا یار سیاستدان تے ہن ڈاکو لٹیرے ۔ پر میکوں افسوس اے تیݙے محمکے ای چس نہی کیتی”۔ میرݨ وت مسکیا
"کیا مطلب وے ؟” فوجی دے منہ تے کاوڑ ودھݨ پو گیی تے اوں ہکی گھٹ اچ چاہ ولوڑ رکھی
"بنگلہ موٹر نوکر چاکر چنگے علاج پیسہ کیکوں ملیے ؟” میرݨ وت سوال کر چھوڑیا
"اعوان کرنل کوں وے ہݨ تے ڈسائم” فوجی ہتھ نال گالھ تے زور ݙے چھوڑیا۔
"کمال اے جیرھا اغوا تھئے ۔ گولیاں کھادن سی اوکوں پلاٹ وی نہی ملیا۔ علاج کیتے او لائن لگدے ۔ پنشن تے زوریں مسیں گزریندے ۔ ٻال وی ایم اے کرتے نوکری کیتے در در تے ذلیل ۔ گولیاں تے تئیں کھادیاں ہن نا؟” میرݨ چاہ دی سرکی لئی۔
"توں وت لبار مار میکوں دیر کرائی میݙا ٹائم ضایو تھئے ۔ تہاکوں ڈسپلن دا کیا پتا۔” فوجی ݙاہ روپے رکھیے تے کاوڑ اچ جلدی نال اٹھی تے ٹر پیا۔
پر اج اوکوں میرݨ دی چھیکڑی گالھ بہوں اوکھا کیتا او ول ول اوں آخری سوال بارے سوچیندا رہیا ۔ ویگن تے پندھ کرݨ دے بعد شہر پجیا اتے اتھاں لحظہ ٹر تے بینک گیا تے لائناں لگیا کھڑیاں ہن۔ بڈھڑے پنشناں کڈھاون کیتے ائے کھڑے ہن۔ لائن لگیے ادھ گھنٹے کھڑ کھڑ لتاں تھک پیاں تے میرݨ دا چھیکڑی سوال وت اگو آگیا. اتے او اپݨے آپ اچ آکھݨ پو گیا۔
"یار گالھ تے ٹھیک ہئی۔ کیا ملیے میکوں۔ گولیاں تے میں کھادیاں ہم”

dailyswail

See author's posts